VIQUEQUE, 19 jullu 2021 (TATOLI)— Benefisiáriu iha aldeia Rade uman, suku Dilór, postu administrativu Lacluta, munisípiu Viqueque agradese ba Governu tanba oferese ona Uma Kbiit La’ek (UKL), ne’ebé ho kondisaun diak tebes.
“Ha’u agradese tebes ba Governu ne’ebé oferese ona uma ba ami, tanba durante ne’e ha’u nunka hetan. Uma ne’e sei hamahon ami hosi udan-been tanba ami-nia uma mós aat ona,” Benefisiária, Paulina Soares hateten ba jornalista Agência Tatoli, iha aldeia Rade uman, segunda ne’e.
Notísia relevante:UKL iha Lacluta sei konstrui uluk iha suku Dilór
Paulina Soares hatutan, atu halo uma hanesan Gorvernu apoia daudaun ne’e, forsa la to’o, maibé grasa Maromak-Nian bele hetan oportunidade ba uma kbi’ik la’ek ida.
Iha fatin hanesan xefe suku Dilór, Jacinto Guterres, haktuir benefisiáriu sira merese duni atu hetan UKL tanba sira tama iha kategoria família vulnerável liu kompara ho família uma-ka’in seluk.
“Autoridade lokál observa uma-ka’ik sira ne’e, tama duni kategoria vulnerável. Tanba ne’e, sira mós bele hetan uma ida hosi Governu,” nia hateten.
Antes ne’e, iha serimónia lansamentu UKL iha postu Lacluta, administradór Munisípiu Viqueque, Januário Soares ‘Bolly’ hateten, programa ne’ebé oitavu Governu estabelese atu hari’i uma ba ema kbi’ik la’ek iha munisípiu Viqueque hamutuk 108 mai hosi suku hamutuk 36, no suku Dilór iha família na’in-tolu mak hetan.
Jornalista: Vitorino Lopes da Costa
Editór: Cipriano Colo
