OÉ-CUSSE, 11 agostu 2021 (TATOLI)-Pároku Pasabe, Padre Agusto Hermenegildo Nunes, husu sarani sira iha Rejiaun Administrativa Espesiál Oé-Cusse Ambeno (RAEOA) atu fiar Estadu no autoridade Oé-Cusse hodi kontribui simu vasina ba kombate COVID-19.
“Iha nia rejiaun agora kazu COVID-19 barak, entaun sarani sira ita tenke mantein regra saúde publika hosi Organizasaun Mundial Saúde (OMS), hanesan fase-liman beibeik ho sabaun ka uza dezinfetante, uza máskara, ita labele fiar ema mai bosok ita, maibé fiar ba ita nia Estadu liuliu autoridade RAEOA atu simu vasina tanba moras ne’e mundiál la’ós ita mesak de’it mak hetan,” Pároku Pasabe, Agusto Hermenegildo Nunes, hatutan mensajen ne’e liuhosi Agência Tatoli iha sub-rejiaun Pasabe, kuarta ne’e.
Iha selebrasaun misa kada domingu, igreja mós fó hanoin beibeik liuhosi omilia no avizu sira katak labele ba fronteira, no labele rona informasaun falsu sira ne’ebé ema balu tenta bosok no lansa iha media sosiál, tanba iha sub-rejiaun Pasabe besik-loos fronteira no sarani sira Pasabe nian barak hala’o negósiu iha área fronteira terrestre ho Indonézia.
Hosi sorin seluk, jestór sub-rejiaun Pasabe, Anton Ulan, informa dezde Governu aplika serka sanitária iha Suku Naimeco, sub-rejiaun Pante Makasar ho suku Bobometo, sub-rejiaun Oésilo, autoridade iha Pasabe la-autoriza ona movimentu ema tama iha sub-rejiaun Pasabe.
“Antes ne’e maluk sira hosi sub-rejiaun Oésilo barak mai fa’an sasán iha merkadu Pasabe, maibé foin daudaun loron merkadu, ha’u haruka seguransa labele husik sira mai fa’an tanba sira nia suku Governu aplika serka sanitária,” nia tenik.
Jornalista : Abílio Elo Nini
Editór : Francisco Simões
