Vasina COVID-19, populasaun Aidaba-Leten konvensidu
BOBONARO, 26 agostu 2021 (TATOLI)—Autoridade lokál hosi suku Aidaba-Leten, postu administrativu Atabae, munisípiu Bobonaro, apoia programa vasina COVID-19, no to’o oras-ne’e luta nafatin atu konvense populasaun hodi simu vasina, nune’e prevene-an hosi COVID-19.
Durante ne’e Xefe suku Aidaba-Leten, Francisco Fontes Leite kontinua koordena hodi halo komunikasaun ho xefe aldeia-sira atu kontinua fahe informasaun loloos ba komunidade, no konsege konvense hodi partisipa másimu simu vasina.
Notísia relevante:Vasina iha Bobonaro remata ho pesoál liña frente 1.292
“Iha ne’e autoridade lokál koordena ho sentru saúde halo kampaña vasina no hala’o vasinasaun mobile, tama-sai aldeia no bairu-sira,” Francisco Fontes Leite, hateten ba jornalista Agência Tatoli, iha suku Aidaba Leten, kinta ne’e.
Nune’e mós komunidade, Martina Tavares, konsidera vasina importante hodi aumenta imunidade atu luta kontra COVID-19, no enkoraza komunidade seluk ne’ebé seida’uk simu, bele ba vasina.
Tuir dadus, suku Aidaba-Leten iha populasaun 3.000-resin mak simu ona vasina doze dahuluk no daruak ho populasaun alvu ne’ebé atu simu hamutuk 6.000.
Jornalista: Nelson de Sousa
Editór: Cipriano Colo
