OÉ-CUSSE, 23 setembru 2021 (TATOLI)—Xefe Departamentu Solidariedade Sosiál no Inkluzaun (DSSI), Adelino Cau, hateten Governu liuhosi ekipa DSSI ho BNCTL sukursál Oé-Cusse hahú halo pagamentu ba benefisiáriu bolsa da mãe 1.039 iha sub-rejiaun Nitibe hosi totál benefisiáriu en-jerál 4.437 iha RAEOA.
“Pagamentu ba benefisiáriu bolsa da mãe iha RAEOA tinan 2021, hahú uluk iha sub-rejiaun Nitibe ba labarik 1.039 no totál en-jerál iha Oé-Cusse hamutuk 4.437, ho nia montante pagamentu hamutuk $494.820,” Adelino Cau informa ba Agência Tatoli iha Santa Rosa, Oé-Cusse, kinta ne’e.
Tuir oráriu, pagamentu bolsa da mãe iha RAEOA hahú uluk iha sub-rejiaun Nitibe iha suku lima (5) ho totál benefisiáriu hamutuk 1.039 ho montante pagamentu hamutuk $112,560,00.
Etapa segundu, sei hala’o iha sub-rejiaun Pasabe ba suku-rua (2) ho totál benefisiáriu hamutuk 557 ho montante pagamentu $54.360.00.
Etapa terseiru sei halo pagamentuu ba benefisiáriu sira iha sub-rejiaun Oésilo ba suku tolu (3) ho totál benefisiáriu hamutuk 803 ho montante pagamentu hamutuk $85.980.00.
Etapa ikus sei halo pagamentu iha sub-rejiaun Pante Makasar ba suku ualu (8) ho totál benefisiáriu hamutuk 2.038 ho montante pagamentu hamutuk $241.920.00
“Ekipa rua hosi Solidariedade Sosiál no Inkluzaun hamutuk ho BNCTL sukursál Oé-Cusse hahú hala’o daudaun ona iha sub-rejiaun Nitibe, no atividade pagamentu ne’e sei ramata iha fulan-outubru tinan ne’e,” nia dehan.
Aliende ne’e, nia informa, pagamentu ba idozu-invalidéz iha RAEOA faze primeiru ramata ona ba benefisiáriu hamutuk 6.471. Daudaun ne’e ekipa sira prepara ona relatoriu ba pagamentu segundu períodu ba tinan ne’e tanba tuir kalendariu pagamentu períodu daruak sei hala’o iha fulan novembru.
Entretantu Xefe Juventude sub-rejiaun Nitibe, Agostinho Afulit, observa durante pagamentu hala’o desde iha loron segunda (20 setembru 2021), benefisiáriu sira antuziasmu hodi partisipa no kumpre protokolu saúde hodi uza máskara no fase liman iha fatin pagamentu.
Jornalista : Abílio Elo Nini
Editór : Cancio Ximenes
