OÉ-CUSSE, 28 setembru 2021 (TATOLI)—Prezidente Autoridade RAEOA, Arsénio Paixão Bano, tersa ne’e hala’o lansamentu hatuur fatuk dahuluk ba projetu rekonstrusaun gabiaun iha bairru Nusla’o, aldeia Bihala, suku Bobokase, sub-rejiaun Pante Makasar.
Notísia Relevante: Autoridade RAEOA aloka millaun $2-resin ba rekonstrusaun gabiaun
Arsénio Paixão Bano hateten, projetu rekonstrusaun gabiaun ne’e nu’udar asaun konkreta hodi responde ba siklone tropikál seroja ne’ebé akontese iha 4 abríl liubá, ne’ebé sobu no estraga mota no plantasaun sira.
“Ohin, ita hahú hatuur fatuk dahuluk ba projetu gabiaun hosi unidade 20 iha sub-rejiaun tolu no autoridade halo atu kontrolu seias ninian. Tinan ida-ne’e, ita halo konstrusaun hosi mota Noel-Ekat, sub-rejiaun Oésilo mai to’o sub-rejiaun Pante Makasar vila laran, kobre ba to’o iha Citrana sub-rejaiun Nitibe,” Arsénio Paixão Bano hateten iha ninia diskursu iha lansamentu ne’e.
Razaun konstrui gabiaun sira-ne’e, nia dehan, tanba iha tinan ne’e siklone tropikál seroja iha loron 4 abril liubá, afeta maka’as hodi estraga area produtiva sira hanesan produtu, to’os no natar komunidade nian.
Tanba ne’e mak autoridade deside, di’akliu halo asaun lalais antes udan monu rai hodi halo asaun prevensaun atu evita-dezastre naturál akontese iha futuru no husu ba empreza sira bele halo projetu ne’e ho kualidade.
“Tinan ida-ne’e oin seluk fali tanba mota mai estraga hotu populasaun nia uma, to’os no natar, nune’e mak tinan ida-ne’e ita konsege halo prevensaun ba natár ektare 1.200 konsege kolleta ho susesu. Agora, ita halo ida-ne’e, ba oin Maromak tulun, ita atu labele repete-tán inundasaun,” nia dehan.
Atu prevene inundasaun, nia apela ba komunidade iha teritóriu Oé-Cusse atu labele tá ai-horis sira iha foho lolon, tanba ne’e mak liuhosi programa Food for Work motiva komunidade atu kuidadu rasik sira-nia ambiente no estrada sira inklui bee-matan sira, nune’e bele fó moris ba populasaun.
Xefe Suku Bobokase, Sebastião Cob, hato’o agradesimentu ba autoridade RAEOA tanba tau matan ona ba komunidade Nusla’o hamutuk uma kain 67 ho populasaun 320 ne’ebé hetan dezastre iha loron 4 abríl liubá ho kondisaun grave.
“Agradese ba autoridade RAEOA tanba iha inisíativa atu apoiu konstrui gabiaun ne’e, nune’e bele tulun netik komunidade iha aldeia Bihala, bairru Nusla’o. Tanba, loron 4 abril ne’e, komunidade uma kain 67 ho totál populasaun 320 bee-mota tama no sobu sira-nia uma no bee estraga sira-nia natar no to’os. Tanba ne’e, ohin, ami kontente tanba hetan ona asaun hosi autoridade tanba tempu udan mós besik ona,” nia dehan.
Projetu rekonstrusaun ne’e konstrui hosi empreza Lifau Indah Unipesoál, Lda, ho nia metru 300, ho valór kontratu $151.203,25 no durasaun servisu durante loron 120.
Entretantu, iha tinan 2021 ne’e, autoridade RAEOA loke konkursu ba projetu gabiaun hamutuk unidade 20 ne’ebé kobre ba sub-rejiaun Oésilo, Pante Makasar no Nitibe, ho montante orsamentu hamutuk millaun $2-resin ne’ebé aloka hosi Orsaementu Jerál Estadu (OJE) 2021.
Jornalista : Abílio Elo Nini
Editór : Cancio Ximenes
