COVALIMA, 29 outubru 2021 (TATOLI)—Diretòr Ministériu Solidariedade Sosial no Inkluzaun (MSSI) Covalima, Agapito Asis, informa to’o oras ne’e ekipa MSSI seidauk finaliza halo levantamentu dadus ba família vulnerável iha Munisípiu Covalima.
“Programa levantamentu dadus kona-ba ema ho bein estar sosiál, ha’u hanoin la’o hela. Tékniku sosial hamutuk ho autoridade suku no postu administrativu sira tun ba terrenu hodi haree kondisaun direta iha suku no aldeia maibé seidauk finaliza,” Diretòr MSSI Covalima, Agapito Asis, informa ba Agência Tatoli, iha nia knar fatin, Suai Loro, Covalima, sesta ne’e.
Nia dehan, bazea ba kalendáriu ne’ebè iha, levantamentu dadus ba família vulnerável sira ne’ebé hala’o durante fulan tolu, hahú iha fulan-setembru, sei finaliza iha fulan-novembru ne’e.
MSSI halo levantamentu dadus ba família vulnerável sira ho objetivuu presiza dadus atuál no kredivel hodi bele hatene tipu família vulnerável sira.
“Ita bele hatene dadus família vulnerável jerál no iha Covalima ita presiza dadus hodi bele atualiza, no ho levantamentuu sai sasukat ba Governu hodi bele mellora di’ak liután liga ho asisténsia sosiál,” nia dehan.
Durante ne’e dadus iha suku sira, nia dehan, família ne’ebè laiha ai-han ne’e jeral de’it maibe la hatene no identifika loloos, tanba ko’alia kona-ba família vulnerável ne’e tipuu vulnerável hanesan família menus ai-han, labarik abandonadu, ferik no katuas hela mesak, inan faluk laiha rendimentu, oan barak no ema ho difisiénsia sira, presiza dadus ne’ebè atuál hodi hadi’a asisténsia umanitária no atendementu.
Levantamentu dadus iha munisípiu Covalima ne’e realiza iha postu administrativu hitu (7), suku 30, aldeia 148 ne’ebè mak oras ne’e la’o hela no levantamentu dadus ne’e seidauk finaliza.
Jornalista : Celestina Teles
Editór : Cancio Ximenes
