Top

JHN komemora Masakre 12 Novembru ho atividade akampamentu

Partisipante atividade akampamentu rona lia-tatoli hosi Preziddente Komité 12 Novembru, Gregorio Saldanha. Imájen Tatoli/ Nelia Fernandes.

DILI, 10 novembru 2021 (TATOLI)-Juventude Hadomi Natureza (JHN) kinta ne’e hala’o atividade akampamentu hodi komemora masakre Santa Cruz 12 Novembru ba dala–XXX (12 novembru 1991-2021).

Koordenadór Asuntu Estudu no Peskiza ba Juventude Hadomi Natureza (JHN), João da Costa Freitas, hateten atividade ne’e hanesan parte ida hosi formasaun ambientál ho formasaun karáter ba juventude sira, tanba haree ba iha problema ne’ebé akontese ne’e barak liu juventude sira mak sai autór.

“Ami hala’o atividade akampamentu ne’e hodi halo reflesaun no refresing ba sira–nia pensamentu, liuhosi vizita fatin turizmu no edukasaun ambientál,” João da Costa Freitas hateten ba jornalista sira iha Igreja Motael, Díli, kinta ne’e.

Iha atividade akampamentu ne’e, JHN ho juventude sira sei hala’o vizita ba fatin turizmu komunitáriu no edukasaun ambientál, ne’ebé lokaliza iha munisípiu Ainaro.

“Iha vizita turizmu komunitáriu iha Maubise ne’ebé lokaliza iha munisípiu Ainaro, hanesan ami ba iha Dokomali, Rabilau, Esalibuti no Foho Edi. Tanba iha ne’ebá, iha sitiu turizmu komunitáriu barak iha ne’ebá. Entaun, ho vizita ne’e, oinsá atu lori juventude no estudante sira ba koñese sira–nia rai rasik,” nia dehan.

Prezidente Komité 12 Novembru, Gregorio Saldanha, sente kontente no agradese ba inisiativa Juventude Hadomi Natureza (JHN) ne’ebé hala’o tanba hadomi natureza.

Partisipante atividade akampamentu hasai foto hamutuk ho Prezidente Komité 12 Novembru, Gregorio Saldanha. Imájen Tatoli/Nelia Fernandes.

“Ho inisiativa ne’ebé sira halo ami agradese, tanba sira iha inisiativa hadomi ita–nia ambiente no ida-ne’e hanesan kontinuasaun luta ne’ebé juventude 12 novembru ho luta ita–nia povu nia durante tempu naruk no aban tama ba tinan 30 masakre Santa Cruz. Ita hanoin hetan ita–nia joven sira, tanba atu manan ba rai ne’e la ko’alia ba administrasaun hasa’e bandeira de’it, maibé ko’alia ba pakote tomak hanesan rai, tasi, foho-lolon no animál sira. Tanba ne’e ema mate defende ba rai ne’e, la’ós pakote ketak–ketak maibé pakote tomak mak naran Timor–Leste, tanba ne’e buat hotu iha Timor laran tenke hadomi,” nia dehan.

Ho inisiativa hosi Juventude Hadomi Natureza (JHN) hanesan ezemplu ba juventude sira seluk atu hadomi ambiente liuhosi labele soe foer, sunu rai no tesi ai arbiru atu nune’e ambiente sai furak no proteje atu labele akontese dezastre naturál.

Atividade akampamentu ne’e hala’o iha munisípiu Ainaro ho durasaun loron haat, hahú hosi 11 to’o 14 novembru 2021. Atividade ne’e realiza tanba hetan apoia hosi Sekretáriu Estadu Juventude no Desportu (SEJD) ho montante $7.372.

Enkuantu, totál partisipante ba atividade ne’e hamutuk 280, kompostu hosi Estudante hosi ensinu sekundáriu, universitáriu no juventude en jerál.

Jornalista : Nelia Fernandes

Editór       : Cancio Ximenes

Publisidade

Leave a Reply

Latest Post

error: Content is protected !!