DILI, 22 dezembru 2021 (TATOLI)—Asosiasaun Jornalista Timor Leste (AJTL), kuarta ne’e, hala’o semináriu nasionál ho tema “Independénsia editoriál iha kontestu eleisaun no feto iha karreira” hodi komemora aniversáriu AJTL ba dala–22 iha Hotel Luz Clarita, Dili.
Notísia Relevante: Partidu polítiku tinan lima la konkore eleisaun sei lakon estatutu
Prezidente Asosiasaun Jornalista Timor Lorosa’e (AJTL), Zevonia Vieira, hateten tema ne’e importante ba AJTL tanba tinan oin Timor–Leste sei iha eleisaun prezidensiál, entaun AJTL halo mídia líterasi ba partidu sira atu komprende, respeita knar no papél jornalista sira-nian durante hala’o kobertura iha kampaña eleitorál.
“Seminariu ne’e atu atu promove jornalista feto sira-ne’ebé mak kontribui iha sira–nia institusaun mídia hodi halo kobertura oioin, ne’ebé mak atu promove feto iha karreira no igualdade jéneru iha kada konsellu redasaun iha mídia ida-idak nian,” Zevonia Vieira hateten ba jornalista sira iha âmbitu semináriu nasionál no aniversáriu AJTL ba dala-22 ne’e.
Durante ezisténsia AJTL, nia dehan, hasoru difikuldade barak liu-liu oinsá mak halo advokásia liu-liu kona–ba oinsá líder nasionál no partidu polítiku sira respeita papel jornalista sira–nia iha públiku hodi respeita jornalista feto sira-nia knar.
Partidu polítiku sira tenke respeita jornalista sira liu-li jornalista feto sira-nia kna’ar atu bele hasa’e dignidade jornalista sira–nian iha situasaun pandemia COVID–19, tanba jornalista feto barak hasoru obstakulu liu-liu kona–ba salariu no liu-liu Governu fó subsídiu ba jornalista front line ho valor osan $5 kada jornalista ida.
“Ida-ne’e signifika katak AJTL presiza halo advokasia makaas liután no aproxima Governu, oinsá respeita jornalista sira–nia servisu ne’ebé sira halo ba interese públiku, atu nune’e hasa’e mós subsídiu ne’ebé mak di’ak ba jornalista sira tanba situasaun ne’e afeta makaas ba iha servisu jornalista nian no mós instituasuan mídia sira-nian.
Oradór no Prezidente Conselho de Imprensa (CI), Virgílio da Silva Guterres, hato’o parabéns ba AJTL tanba iha inisiativa involve iha luta ba aspeitu hotu–hotu liu-liu luta liberdade imprensa, igualdade jenéru, kombate dezinformasaun, seguransa no internet, hatudu AJTL ninia maturidade, preokupasaun no ninia kompromisiu ba sosiedade ida-ne’ebé livre.
Entretantu, iha serimónia aniversáriu Asosiasaun Jornalista Timor Lorosa’e ba dala-22 ne’e partisipa hosi reprezentante Partidu Demokrátiku (PD) no Partidu KHUNTO, Komisaun Nasionál Eleisaun (CNE-Sigla Portugés), Prezidente Conselho de Imprensa (CI-sigla portugés), Reprezentante Sekretária Estadu Igualdade no Inkluzaun (SEII) no membru AJTL sira.
Jornalista : Nelia Fernandes
Editór : Cancio Ximenes
