DILI, 13 janeiru 2022 (TATOLI)—Sekretáriu Estadu Asuntu Kombatente Libertasaun Nasionál (SEAKLN), Gil da Costa Monteiro “Oan Soru”, hateten ekipa verifikadór hosi nasionál verifika ona dadus veteranu rejistadu 2009 hamutuk 60.215 iha territóriu nasionál.
Notísia Relevante: Aban, ekipa sei dezloka ba munisípiu verifika veteranu nia dadus
“Iha fulan-agostu mak ami-nia ekipa tun ba baze halo verifikasaun. Ita foin mak atinje 43,7% ho totál 60.215,” Gil da Costa Monteiro “Oan Soru” ba Agência Tatoli iha nia knar fatin Caicoli, Dili, kinta ne’e.
Nia dehan, daudaun ne’e sei hela ema 60.000 resin mak seiduak verifika hotu maibé bainhira laiha tan COVID-19 entaun ekipa verifikadór nasionál sei konklui atividade verfifikasaun iha tinan ida-ne’e.
Daudaun ne’e sei suspende provizóriu tanba sei hein implementasaun OJE 2022 hafoin kontinua fali halo verifikasaun ba dadus restu sira-ne’e.
Antes ne’e Prezidente Konsellu Veretanu, Vidal de Jesus “Reak Leman” hatete komisaun vefirikadór verifika ona ema hamutuk 60.215 kompostu hosi munisípiu Aileu hamutuk 3.577, Ainaro 3.657, Baucau hamutuk 5.755, Bobonaro 5.439, Covalima 5.157, Dili 3.658, Ermera 4.657, Lautém 5.917, Liquiça 5.882, Manatuto 4.478, Manufahi 4.821, Rejiaun Administrativa Espesiál Oé-Cusse Ambeno (RAEOA) 3.441 no Munisípiu Viqueque hamutuk 3.776.
“Barak mak komisaun verifikadór seidauk verifika hotu maibé ami nafatin esforsu atu aselera lalais prosesu verifikasaun ne’e, nune’e bele enkamiña mai iha nasionál hodi verifika tuir, katak ema ida-ne’ebé elizivel ka iha direitu atu simu pensaun ne’e,” nia dehan.
Maibé Konsellu Veteranu sei hein Orsamentu Jerál Estadu 2022 tanba orsamentu refere Prezidente Repúblika promulga ona, entaun bele kontinua halo atividade verifikasaun iha munisípiu sira.
“Ita foin lalais loron boot natál no tinan foun ita suspende provizóriu depois fulan ne’e atu kontinua maibé ita sei hein orsamentu mak bele kontinua verifika tanba ita-nia Prezidente Repúblika promulga ona iha dezembru liubá. Bainhira osan tama ona mai ministériu nian mak ita hahú fali,” nia dehan.
Notísia Relevante: Ekipa nasionál verifikasaun dadus veteranu rejistadu 2009 foin verifika 120.000-resin
Jornalista : Osória Marques
Editór : Cancio Ximenes
