DILI, 19 janeiru 2022 (TATOLI)—Diretór Jerál Sekretariadu Tékniku Administrasaun Eleitorál (STAE), Acilino Manuel Branco, hateten tuir planu STAE sei transport aka lori materiál eleisaun ba diaspora, nune’e bele halo preparasaun no fasilita eleitór sira partisipa iha eleisaun prezidensiál 2022.
Notísia Relevante: STAE-MNEK hahú koordena hodi estabelese sentru votasaun iha diáspora
“Materiál ba eleisaun nian ne’e ita preparadu ona no tuir ita-nia planu entre fevereiru nia klaran ne’e, sasán sira-ne’e tenke transporta ona ba diáspora tanba antes to’o ne’ebá ita mós tenke hatene informasaun sira-ne’e. Maibé STAE nia planu, tarde liu iha loron 12 fevereiru tenke sai hosi Dili ba diaspora,” Acilino Manuel Branco hateten ba Agência Tatoli iha nia knar fatin Vera Cruz, Dili, kuarta ne’e.
Aleinde ida-ne’e, presiza mós hatene voo ne’ebé mai Timor-Leste maibé pandemia COVID-19 iha mundu normál fali ona, no hein katak voo komersiál bele la’o ona nune’e bele fasilita ba prosesu eleitorál no realiza eleisaun prezidensiál iha diaspora.
Iha ne’e sei haree ba voo ne’ebé mai Timor-Leste no mós haree took posibilidade ba nasaun seluk liu-liu kona-ba konesaun aviaun ba rai-li’ur maibé konesaun mai Timor-Leste ne’e mak sei haree hela, tanba eleisaun la’o tuir kalendáriu ne’ebé estabelesidu.
Bainhira tama iha fulan-marsu mak laiha voo komersiál ruma mak halo konesaun hodi tula materiál eleisaun hosi Dili ba diaspora no lori fila sasán ne’e, entaun ida-ne’e mós sai kestaun ida ba Timor-Leste presiza haree mós ba kestaun ne’e.
Ho kestaun ne’e, nia dehan, STAE sei haree situasaun hodi bele koloka tuir no foti desizaun ruma tanba data tentativa ne’ebé tarde liu mak loron 12 fevereiru ne’e, materiál eleisaun ne’e tenke transporta ona ba diáspora.
Kona-ba rezultadu resensiamentu eleitorál no atualizasaun baze dadus, nia dehan, sei iha faze sinkronizasaun hela no iha tempu badak STAE sei anúnsia sai rezultadu resensiamentu eleitorál iha territóriu nasionál.
Jornalista : Osória Marques
Editór : Cancio Ximenes
