DILI, 28 janeiru 2022 (TATOLI)— Vise Ministru Interiór, António Armindo, informa, hahú prevee osan milliaun $4 hodi aluga karreta 45 hodi fasilita Polísia Nasionál Timor-Leste (PNTL) asegura seguransa ba atividade kampaña eleitorál no eleisaun Prezidensiál iha tinan ne’e.
“Komisaun B ne’ebé trata asuntu seguransa, defeza no negosiu Estranjeiru iha Parlamentu Nasionál konvida ha’u ho Ministru Finansa atu aprezenta planu asegura seguransa kampaña no eleisaun, nune’e iha PNTL ita prevee osan milliaun $4 atu antesipa fasilidade ka transporta ba polísia asegura seguransa iha Ita nian kampaña no eleisaun,”, Ministériu Interiór ne’e hateten hafoin partispa seremónia graduasaun Ofisiál no Inspetór PNTL na’in-35 iha Sentru Formasaun Polísia ( CFP, sigla portugés)-Comoro, sesta ne’e.
Notísia relevante: PNTL hahú diskute estratéjia asegura kampaña-eleisaun prezidensiál
Nia dehan, durante aprezentasaun planu Governu nian liuliu ba antesipasaun kampaña no eleisaun, husu MF atu prevene mós milliaun $1 ba suplementu ba membru PNTL iha ámbitu asegura atividade eventu demokrátiku ne’e.
“Ami husu tan Ministériu Finansa prevee milliaun $1 atubele ajuda suplementu fó ba membru PNTL sira ne’ebé ita koloka no kombustivél ba karreta ka transporte 45 ne’ebé aluga hodi hala’o operasaun durante kampaña no eleisaun prezidensiàl,” Governante ne’e haktuir.
Nune’e, Ministériu Interiór ho Komandu PNTL koordena malu atu aluga viatura 45 ne’e ho prazu uza ba operasaun durante loron 30 iha períodu kampaña to’o eleisaun Prezidensiál.
“Ita nia kampaña durante loron 15 de’it, maibé ita antisipa nafatin, sira (PNTL) uza to’o situasaun eleisaun remata no karik eleisaun ronde daruak iha tan,” nia hatutan.
Iha fatin hanesan, Komandante Jerál PNTL, Komisáriu Faustino da Costa, dehan PNTL prezia duni atu aluga karreta hodi koresponde ba seguransa iha ámbitu kampaña eleitorál no eleisaun prezidensiál.
“Ita iha dalan rua, ida maka prevee osan aluga karreta iha rentál sira atubele fó membru PNTL sira hodi halo seguransa iha tempu kampaña no eleisaun. Dalan seluk maka karik karreta rentál sira la sufisiente tenke buka karreta Estadu sira ne’ebé dadaun Governu deside re-aloka iha edifísiu atubele fasilita asegura seguransa iha kampaña no eleisaun,” nia akresenta.
Tanba, Komisáriu Faustino rekoñese, PNTL iha dezafiu no difikuldade atu asegura seguransa perante kampaña no eleisaun.
“Tanba ita hatene sentru votasaun Governu aumenta 100-resin, ne’e difikuldade ba PNTL atu halo seguransa, maibé hanesan ha’u dehan beibeik katak PNTL nuudar instituisaun Estadu sempe prontu kuálker tempu,” Komandante Jerál ne’e kompromete.
Notísia relevante: PNTL preparadu asegura seguransa iha eleisaun prezidensiál 2022
Jornalista: Natalino Costa
Editór : Florencio Miranda Ximenes
