DILI, 02 fevereiru 2022 (TATOLI)—Prezidente Repúblika, Francisco Guterres ‘Lú-Olo’, kuarta ne’e fó pose ba Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál, Falur Rate Laek, ho fitun tolu hodi lidera instituisaun FALINTIL-Forsa Defeza Timor-Leste (F-FDTL).
Komandante Supremu Forsa Armada ne’e hato’o nia konviksaun katak Tenente Jenerál Falur Rate Laek sei kumpre misaun ne’ebé tula iha nia kbaas leten hodi hala’o ba nasaun no FALINTIL-Forsa Defeza Timor-Leste nia di’ak ho apoiu hosi Prezidente Repúblika.
Notísia Relevante: PR hakaas an hametin unidade Estadu no haforsa identidade timor-oan
“Ba Tenente Jenerál ne’ebé ohin simu knaar nu’udar Xefe Estadu Maiór Jenerál Forsa Armada iha forsa, iha parada no dirijente polítiku no Estadu Timor-Leste sira-nia oin, ha’u hato’o ha’u-nia konviksaun katak Tenente Jenerál sei kumpre misaun ne’ebé ema fó fiar ba ita atu hala’o, ba Nasaun no FALINTIL-Forsa Defeza nia di’ak. Ba misaun ida-ne’e, bele konta ho apoiu no solidariedade institusionál hosi Prezidente Repúblika,” Prezidente Repúblika ne’e hateten iha ninia diskursu iha serimónia fó pose ne’ebé hala’o iha Kuartél Jenerál Fatuhada, iha ámbitu komemorasaun loron transformasaun FALINTIL ba FALINTIL-Forsa Defeza Timor-Leste (F-FDTL) ba dala-21 (02 fevereiru 2000-02 favereiru 2022), kuarta ne’e.
Iha momentu ne’ebé Tenente Jenerál simu pose nu’udar Xefe Estadu Maiór Jenerál FALINTIL-FDTL, Falur foti knaar aas liu iha ierarkia militár hodi kaer responsabilidade aas liu iha nivel komandu militár Forsa Armada sira-nian no akonsellamentu militár ba órgaun soberania sira ho kompeténsia iha área Defeza no Seguransa Nasionál.
Knaar ida-ne’e, hanesan dezafiu di’ak ida ba ofisiál ne’ebé de’it iha FALINTIL-FDTL, maibé mós dezafiu boot liu ida hosi dezafiu boot hirak ne’ebé nia sei hasoru durante ninia mandatu.
Dezafiu ne’e atu haburas no hametin estrutura superiór komandu no kontrolu nian, formasaun, aprontamentu no sustentasaun ba forsa hodi halo sira sai fleksivel liután no prontu atu hatán ba dezafiu ne’ebé de’it.
“Ha’u fiar katak Jenerál Falur sei hatutan asaun komandu hosi instituisaun militár ida-ne’ebé nia haknaar an nu’udar Xefe Estadu Maiór Jenerál. Maibé, atu halo nune’e, nia sei presiza ema hotu nia apoiu no kolaborasaun, liuliu hosi sira-ne’ebé serbisu besik liu ho Xefe Estadu-Maiór Jenerál iha FALINTIL-FDTL no la kle’ur tán sei nomeia hosi Prezidente Repúblika. Kolaboradór sira-ne’e mak Vise-Xefe Estadu Maiór Jenerál, Xefe Estadu Maiór FALINTIL-FDTL no Komandante sira komponente nian,” nia dehan.
Tanba, nia dehan, Instituisaun Militár hanesan riin importante tebes ida atu Timor-Leste bele hamriik nu’udar Pátria.
FALINTIL-Forsa Defeza Timor-Leste hanesan instituisaun ida-ne’ebé iha hela evolusaun nia laran no la’o tuir nia dalan tuir limitasaun sira-ne’ebé mosu hosi kontestu nasionál, no dezafiu ne’ebé iha nia oin hanesan ezersísiu kompleksu ida ba jestaun nesesidade, interese no ojetivu, ne’ebé bele rezolve de’it liuhosi prosesu planeamentu ida-ne’ebé rigorozu no ezijente kona-ba defeza nasionál no forsa.
Prosesu hirak-ne’e estabelese ona iha lei, liu-liu iha estratéjia militár nia dokumentu estruturante sira, ne’ebé mak foin lailais aprova.
Loos duni katak, Timot-Leste presiza hadi’a nafatin kuadru legál no regulamentár ba dezenvolvimentu no reforsu hosi instituisaun militár, hodi halo nia sai presizu no efetivu liután, atu nune’e bele hetan konsensu ida-ne’ebé luan hosi ajente polítiku no órgaun soberania tomak.
“Klaru ke ita presiza harii Sistema Forsa nia kapasidade sira. Tanba ne’e mak ita luta naba-naba atu halo ita-nia forsa sira sai ekipadu di’ak liután. Maibé ema sira-ne’ebé hatene ita-nia istória hatene mós katak ema rasik no sira-nia vontade atu luta mak halo diferensa. No ita sei kontinua nafatin hanesan ne’e. Instituisaun Militár ne’e ba futuru tenke kompostu hosi ema militár ke iha kompeténsia no motivasaun, ne’ebé tuir padraun aas liu ba formasaun, kualifikasaun no treinu,” nia hateten.
Aleinde ne’e, Prezidente Repúblika ne’e informa katak iha serimónia tomada de pose ne’e mós iha despedida hosi Timor-Leste nia soladu ida, Tenente Jenerál Lere Anan Timur, ne’ebé ramata ninia karreira militár ne’ebé naruk ho signifikadu aas tebes.
Oras despedida ba Komandante Militár ida sempre iha signifikadu aas tebes. Tanba ramata ona knaar tuir nia pedidu rasik, ha’u hakarak aproveita biban ida-ne’e hodi hato’o rekoñesimentu ba servisu sira-ne’ebé mak nia presta ba Pátria no FALINTIL-FDTL durante ne’e, hodi sai ezemplu di’ak ida atu banati tuir no fó prestíjiu boot ba Timor-Leste,” Lú Olo hateten.
Notísia Relevante: Prezidente Repúblika fó pose ba Tenente Jenerál Falur
Jornalista : Nelson de Sousa
Editór : Cancio Ximenes
