DILI, 04 fevereiru 2022 (TATOLI)—Programa Nasaun Unida ba Dezenvolvimentu (PNUD), iha sesta ne’e, asina ona nota kooperasaun ho Komisaun Nasionál Eleisaun (CNE,sigla portugés) hodi instala plataforma informasaun dijitál kona-ba eleisaun prezidensiál 2022.
Nota kooperasaun ne’e asina husi Reprezentante Rezidente Programa Nasaun Unida ba Dezenvolvimentu iha Timor-Leste, Munkhtuya Altangerel ho Prezidente CNE, José Agostinho da Costa Belo, iha salaun Laline CNE, Dili.
Munkhtuya Altangerel hateten liuhosi parseria ne’e atu garante povu bele asesu informasaun liuhosi meius dijitál, edukasaun no komunikasaun, no mós formasaun ba pesoál CNE sira kona-ba meus prevensaun COVID-19 iha kampañia no eleisaun prezidensiál nune’e bele garante eleisaun la’o ho seguru no susesu iha futuru.
“Partisipasaun demokrasia ne’e ko’alia mós kona-ba inkluzaun, tanba ida-ne’e importante iha espasu ba partisipasaun. Ami fiar katak akordu ida-ne’e sei apoiu CNE atu kria kondisaun ba membru sosiedade oioin atu bele partisipa iha eleisaun prezidensiál mai,”nia dehan.
Programa ne’e finansia husi Governu Japaun ho orsamentu hamutuk millaun $ 4.4 ba eleisaun prezidensiál, parlamentár, eleisaun suku no mós komunikasaun kona-ba prevensaun COVID-19 iha TL.
Prezidente CNE, José Agostinho da Costa Belo, rekoñese apoiu husi Governu Japaun ba prosesu eleitorál sira ne’e desde uluk kedas hafoin Timor-Leste restaura ninia independensia iha tinan 2002 liubá.
“Kontribusaun ne’ebé mak ohin loron CNE simu liuhusi akordu ida-ne’e sei fasilita votante sira atu asesu ba informasaun kona-ba servisu fiskalizasaun no supervizaun ba siklu eleisaun sira,”José belo hateten.
Programa instalasaun informasaun dijitál ne’e sei envolve mós Universidade WASEDA husi Japaun no UNiversidade Nasionál Timor Lorosa’e (UNTL).
Jornalista : Osória Marques
Editór : Agapito dos Santos
