LEI, NASIONÁL, POLÍTIKA

STAE konklui ona verifika dokumentu kandidatu PR períodu 2022-2027

STAE konklui ona verifika dokumentu kandidatu PR períodu 2022-2027

Diretór Jerál STAE, Acilino Manuel Branco. Imajen TATOLI/António ‘Dasiparu’ Gonçalves.

DILI, 10 fevereiru 2022 (TATOLI)—Diretór Jerál Sekretariadu Tékniku Administrasaun Eleitorál (STAE), Acilino Manuel Branco, informa tékniku Sekretariadu Tékniku Administrasaun Eleitorál konklui hotu ona halo verifikasaun ba dokumentu kandidatura Prezidente Repúblika períodu 2022-2027 na’in-17 no submete ona ba Tribunál Rekursu iha kinta (09 fevereiru) kalan, iha tuku 22h00.

Notísia Relevante: STJ hahú verifika dokumentu kandidatu Prezidente Repúblika na’in-17

“Ami konklui hotu ona prosesu verifikasaun ba kandidatu hotu-hotu iha horikalan tuku 22h00 no submete hotu kedas ba iha Tribunál Rekursu no hein de’it Tribunál Rekursu kontinua prosesu tuir mai. Bainhira Tribunál Rekursu haree iha irregularidade ne’ebé mak STAE deteta iha kandidatu nian ka rekezitu balun ne’ebé mak seidauk kompleta mak Tribunál Rekursu iha nia kompeténsia tomak bolu kandidatu atu hato’o ba reprezenta kandidatu, nune’e kompleta iha tempu badak,” Acilino Manuel Branco hateten ba Agência Tatoli, iha nia knaar fatin Caicoli, Dili, kinta ne’e.

Nia dehan, verifika no rezultadu hotu sei entrega ba iha Tribunál Rekursu (TR) depois TR mak sei haree STAE nia rezultadu hafoin notifika ba kandidatu refere liuhosi nia reprezentante.

Tuir nia, parese tarde liu mak iha segunda no tersa semana oin, Tribunál Rekursu (TR) anúnsia ona rezultadu finál kona-ba kandidatura admitidu sira-ne’e.

Entretantu tuir Lei no regulamentu ne’e hateten momoos katak kandidatura atu aprezenta lista proponente ne’ebé mak komtempla naran proponente, númeru eleitorál ho asinatura inklui aprezenta mós formatu eletróniku.

Lei artigu 19 kona-ba lei eleisaun prezidensiál, sesta alterasaun, lei númeru 15/2021, iha ne’ebá hateten katak, lori apoiu rekursu ba iregularidade ba tribunal. Entaun kritériu ne’e regula iha lei no tribuáal mak haree ba prosesu tomak kandidatura nian maibé STAE halo verifikasaun ba proponente de’it.

“Informasaun ne’ebé mak ita verifika ne’e bazea ba proponente sira, entaun iha lei ne’e hateten proponente sira só apoiu dala ida labele dala rua dentro iha nia kandidatura rasik no dentro kandidatura seluk nian,” nia dehan.

Nia haktuir, formatu eletróniku mak di’ak tebes tanba fasil verifika ba baze de dados tanba halo konesaun direta ba observadór sentrál nian.

“Formatu eletróniku ne’e ita haree di’ak tebes hodi verifika ho baze de dados ne’ebé ita-nia sistema integradu, nune’e halo konesaun observadór sentrál kuandu ita input nia deteta kedas iha baze de dados, sé ema ne’e prenxe rekezitu mínimu ka lae. Tanba, ita mós deteta katak afinál proponente balun seidauk kompleta tinan 17 iha loron votasaun, ida-ne’e mós hanesan informasaun ne’ebé ita pasa ba Tribunál Rekursu. Ita deteta eleitór balun iha ita-nia sistema ita elimina tiha ona tanba sira mate tiha ona,” nia informa.

Iha lei hateten katak, iha validasaun ne’e proponente konsidera númeru ida-ne’ebé mak ki’ik liu alias ida-ne’ebé mai uluk, ida-ne’e mak ita-nia sistema deteta bainhira lista proponente, tuir mai mak input sistema sei fó sinál mean kedas no hatudu katak nia fó ona apoiu ba kandidatu seluk.

Aleinde ne’e, sistema sei fó sinál katak fó ona nia apoiu seluk, maibé ema hanesan fó apoiu dala rua ba nia kandidatu, tanba aleinde formatu manuál no formatu eletróniku ne’e mak STAE utiliza ba sistema ne’ebé mak montadu ona.

Maibé, nia dehan, karik iha tan pedidu adisionál ruma mak STAE nia tékniku prontu hodi kontinua fó apoiu ba nesesáriu ruma.

Jornalista : Osória Marques

Editór      : Cancio Ximenes

iklan
iklan

Leave a Reply

iklan
error: Content is protected !!