DILI, 15 fevereiru 2022 (TATOLI)—Ekipa konjunta kompostu hosi Departamentu Jestaun Merkadu hamutuk ho Pesoál Saneamentu hosi Autoridade Munisípiu Díli (AMD), tersa (15/02) ne’e, hala’o limpeza jerál ba kioske 35 ne’ebé ahi han iha merkadu Manleuana, maizumenus tuku 06h00 dadeersan ne’ebé deskonfia kauza hosi liña eletrisidade.
“Ohin, ita-nia ekipa jestaun merkadu hamutuk ho servisu saneamentu munisípiu Díli, halo ona intervensaun hodi halo limpeza jerál ba ahi han fatin obralan iha merkadu Manleuana,” Xefe Departamentu Jestaun no Merkadu, Arthur Henriques, informa ba Agência Tatoli iha Merkadu Manleuana, Dili, tersa ne’e.
Nia esplika, akontesimentu iha Merkadu Manleuana Blok A ne’e rezulta ahi han kioske hamutuk 35 no hosi akotesimentu ida-ne’e hetan intervensaun kedas hosi parte Bombeirus ho Polísia Esquarda Dom Aleixo, hodi hamate ahi han negosiante 35 nia barraka.
Ho intervensaun ne’e, Autoridade Munisípiu Dili (AMD) liuhosi Departamentu Jestaun Merkadu hamutuk ho membru tomak halo kedas intervensaun hodi halo limpeza hodi lori fo’er sira-ne’e ba so’e iha lixeiru Tibar.
Kauza hosi akontesimentu ne’e, nia afirma, kauza ba ahi han kioske 35 ne’e hosi sirkuitu eletrisidade, nune’e alastra ba fatin seluk hodi halo ahi lakan makaqs no ahi han hotu kedas roupa obralan iha fatin refere.
“Tanba, ita-nia komunidade balun faan obralan no sira halo didin ho lona, nune’e fasil tebes ahi han da’et husi uma id aba uma seluk,” Xefe Jestaun Merkadu ne’e hateten.
Hosi ne’e, provisóriamente negósiante sira labele halo lai atividade negósiu iha fatin refere, tanba Departamentu Jestaun Merkadu sei halo levantementu dadús ba negósiante sira-ne’ebé sai vítika ba kazu refere.
“Alende ne’e, ami foti foto no filmajen ba sira-nia fatin akontesimentu, hosi ne’e ami mós foti foto kada ema ida, atu nune’e ami hato’o relatóriu ba Prezidente Autoridade atu enkamiña ba Instituisaun ne’ebé kompetente, liu-liu ba iha Sekretáriu Estadu Protesaun Sivil no Ministériu Solidaridade Sosiál atu haree ba asuntu ida-ne’e,” nia dehan.
Jerente Merkadu Manleuana, Julio Barros, informa akontesimentu ne’e deskonfia mosu sirkuitu hosi liña eletrisidade iha fatin refere, hodi rezulta ahi han mohu fatin faan roupa obralan ne’e.
“Ahi lakan tuir iha fiu listrik nian, ida-ne’e mak suli tun fali ba roupa sira-ne’e, hodi halo ahi han liña ne’e hotu kedas,” nia konta tuir.
Entretantu, tuir dadús hosi Xefe Departamentu Jestaun no Merkadu, Arthur Henriques, informa katak negosiante sira-ne’ebé ahi han sira-nia kioske hamutuk 35, hosi ne’e kompostu hosi negosiante obralan 34 no Salon tesi fuuk ka barbara ida (1).
Hafoin akontesimentu ahi han kioske 35 iha merkadu Manleuana, ohin ekipa konjunta hosi Autoridade Munisípiu Dili kompostu hosi Departamentu Jestaun Merkadu no Servisu Saneamentu halo ona limpeza jerál hodi hamoos kedas ba fatin refere.
Enkuantu, ba eletrisidade ekipa tékniku hosi Eletricidade de Timor Leste, Empreza Públika (EDTL, E.P) hadi’a ona eletrisidade iha fatin refere.
Jornalista : Nelia Fernandes
Editór : Cancio Ximenes
