DILI, 17 fevereiru 2022 (TATOLI)— Supremu Tribunál ba Justisa (STJ) liuhosi Tribunál Rekursu (TR), kuarta ne’e, realiza ona seremonia dada númeru sorteiu ba kandidatu Prezidente Repúblika 2022-2027 nain-16 ne’ebé admitidu iha prosesu verifikasaun atu kompete iha eleisaun Prezidensiál ne’ebé realiza iha loron 19 marsun tinan ne’e.
“Horiseik, ita indefere tiha rekursu hosi kandidatu ida, ho nune’e horisehik ita hasai lista defitiva ba kandidatu admitidu tanba ne’e mak, ohin ita dada númeru sorteiu ba kandidatu sira,” Prezidente Tribunál Rekursu liuhosi nia intervensaun bainhira dada sorteiu ba kandidatu PR iha sala Tribunál Rekursu-Caicoli, kinta ne’e.
Kandidatu na’in-16 ne’ebé admitidu mak hanesan, kandidatu hosi partidu CNRT, José Manuel Ramos Horta, partidu KHUNTO, Armanda Berta dos Santos, partidu FRETILIN Francisco Guterres Lúo-Olo, hosi PD Mariano Asanami Sabino, Partidu Demokrátiku da Repúblika de Timor (PDRT) Anacleto Bento Ferreira.
Kandidatu independente kompostu hosi Felisberto Araújo Duarte, Milena Pires, Angela Freitas, Isabel Fereira, Hermes da Rosa Correia Barros, Lere Anan Timur, Rogério Tiago Lobato, Virgílio Guterres, Constâncio da Conceição Pinto,Antero Benedito da Silva no Martinho Germano Gusmão.
Nune’e, iha rezultadu dada sorteiu ba kandidatura mak hanesan:
- Isabel da Costa Ferreira
- Hermes da Rosa Correia Barros
- Maria Ângela Freitas da Silva
- Rogério Tiago Lobato
- Anacleto Bento Pereira
- Francisco Guterres Lú-Olo
- Maria Elena Lopes de Jesus Pires
- Lere Anan Timur
- Armanda Berta dos Santos
- Antero Benedito da Silva
- Constâncio Pinto
- Virgílio Guterres
- Martinho Gusmão
- José Ramos Horta
- Felisberto Araújo Duarte
- Mariano Assanami Sabino
Hafoin dada sorteiu, Prezidente Deolindo informa ho baze ba númeru sorteiu ne’e mak sei komunika ba Sekretariádu Tékniku Administrasaun Eleitorál (STAE) no Komisaun Nasionál Eleisaun (CNE, sigla Portugés) hodi kontinua ba prosesu imprime bulletin votu.
“Ba kandidatu sira prosesu mak ne’e no bom susesu ba imi hotu tanba prosesu ba primeira faze ba eleisaun mak ne’e no prosesu apuramentu finál ho nia rezultadu maka sei mai fali,” Prezidente Deolindo afirma.
Notísia relevante: Tribunál Rekursu indefere rekursu kandidatu PR Luis Tilman
Jornalista : Natalino Costa
Editór : Florencio Miranda Ximenes
