Governu sei konstrui uma 30-resin ba veteranu grau 15-19
DILI, 17 fevereiru 2022 (TATOLI)—Sekretáriu Estadu Asuntu Kombatente Libertasaun Nasionál (SEAKLN), Gil da Costa ‘Oan Soru’, informa iha faze daruak ne’e Governu sei konstrui uma 30-resin ba veteranu grau 15-19.
Notísia Relevante: Governu sei harii uma ba veteranu hamutuk 117 pur etapa
“MAKLN iha ona planu atu konstrui uma ba veteranu grau 15-19 maibé agora ita sei tau prioridade ba programa bolsa estudu ba veteranu nia-oan sira, tanba ne’e ita sei foka hela ba nia lai depois hotu mk ita hakat ba konstrusaun ne’e,” Gil da Costa ‘Oan Soru’ hateten ba Agência TATOLI, iha nia knaar fatin Caicoli, Dili, sesta ne’e.
Veteranu hotu-hotu la’ós hetan hotu uma maibé parte relevante sei halo identifikasaun katak ida-ne’ebé mak bele duni atu hetan uma, no osan ne’ebé mak prevee ba konstrusaun uma veteranu hamutuk millaun $1,500.
“Hosi osan ne’e ita seidauk hatene veteranu ida hetan osan hira maibé konserteja osan sei la hanesan ho veteranu grau 20-24 nian. Medida uma no kuantidade sei la hanesan tanba tinan no grau de’it la hanesan tanba ne’e ita sei haree,” nia informa.
Prezidente Konsellu Libertasaun Nasionál, Vidal de Jesus ‘Reak Leman’, hateten tuir planu ministéiru nian, ba tinan oin faze daruak sei atribui mós konstrusaun uma ba veteranu 100-resin ho grau 15-19 maibé ho fazeadamente sei atribui uluk ba veteranu 30-resin no sei haree ba hotu-hotu ho kada uma kustu orsamentu rihun $35.
Bainhira harii hotu ona “Uma Veteranu” ba veteranu sira ho grau 15-19 sira-ne’e mak sei kontinua haree mós veteranu dezmobilizadu ho grau 8-14.
Antes ne’e, Governu prevee osan hamutuk $2,400,000 no kada veteranu hetan $4,000 ne’ebé luta tinan 20-24 nia-laran iha ai-laran hamutuk na’in-98 no hosi ema hirak ne’e barak liu mak hosi rejiaun I Lospalos, tuir mak rejiaun II Viqueque, Baucau no seluk tán.
Jornalista : Osória Marques
Editór : Cancio Ximenes
