DILI, 21 fevereiru 2022 (TATOLI)–Ministériu Finansa (MF) liuhosi Diresaun Jerál Jestaun Patrimóniu Estadu, ho aprovasaun Ministra Finansa interina, Sara Lobo Brites, entrega veíkulu Estadu faze dahuluk hamutuk unidade 36 ba Ministériu Interiór (MI).
Veíkulu hirak ne’e hodi apoiu servisu Polísia Nasionál Timor-Leste (PNTL), fó seguransa durante kampaña Eleisaun Prezidensiál, ne’ebé sei hahú iha loron 02 marsu.
“Hahú hosi loron 24 janeiru to’o iha 11 fevereiru 2022, ekipa konjunta konsege rekolla ona karreta Estadu hamutuk unidade 395 hosi liña ministeriál, Instituisaun Estadu no Servisu Fundu Autónoma,” refere nota ne’ebé Agência TATOLI asesu, segunda ne’e.
Notísia relevante: MF rejista veíkulu Estadu 3.415
Diresaun Jerál Jestaun Patrimóniu Estadu rekolla veíkulu hirak ne’e, liuhosi implementasaun Padraun Prosedimentu Operasionál ne’ebé gia ekipa konjunta, kona-ba realokasaun no utilizasaun veíkulu Estadu iha Ministériu, Instituisaun Estadu, Servisu Fundu Autónoma no Pool Nasionál, ne’ebé estasiona iha kampaun Balide, Dili.
Enkuantu, ba-oin MF sei kontinua koordena hodi aloka tan veíkulu Estadu hamutuk unidade 26 ba Sekretariadu Tékniku Administrasaun Eleitorál (STAE), unidade 13 ba Komisaun Nasionál Eleisaun (CNE, sigla portugés) no instituisaun Estadu sira seluk iha ámbitu atividade Eleisaun Prezidensiál períodu 2022-2027, ne’ebé sei realiza iha 19 marsu 2022.
Tinan kotuk (2021), atu hadi’a jestaun veíkulu ho rigorozu, VIII Governu Konstitusionál aprova ona Rezolusaun Governu ho númeru 130/2021 kona-ba Jestaun no Realokasaun veíkulu Estadu, ne’ebé sei regula no kria kondisaun sira atubele reforsa jestaun ne’ebé efisiente no rigór liután, atu nune’e bele kontribui ba efisiénsia no rasionalizasaun gastu ba Karreta Estadu.
Aprovasaun ne’e fó kompeténsia téknika ba MF atu koordena, organiza, no implementa polítika Jestaun no Realokasaun veíkulu Estadu.
Jornalista : Antónia Gusmão
Editora : Julia Chatarina
