CNE konklui iha sábadu kalendáriu kandidatu PR

DÍLI, 24 fevereiru 2022 (TATOLI) – Prezidente Komisaun Nasionál Eleisaun (CNE-sigla portugés), José Belo, informa CNE sei finaliza kalendáriu kandidatu Prezidente Repúblika (PR) iha sábadu (26/02) semana ne’e.
“Tanba kandidatu PR sira maioria mak submete hotu ona dokumentu ba CNE tanba ne´e sei halo análize no veifika kalendáriu kona-ba data no fatin ba kampaña iha kapitál”, Prezidente CNE hateten bainhira hasoru malu ho Xefe Governu iha nia rezidénsia Faról, Dili, ohin.
Nune’e, loron 26 agora, CNE sei konvida reprezentante kandidatu sira atu finaliza data no fatin kampaña ba kandidatu sira ho objetivu atu tuir regra hodi realiza kampaña ho forma adekuada.
“CNE sei konvida reprezentante kandidatu sira ho objetivu atu entende ho sira seluk. Kuandu seidauk iha solusaun, CNE sei halo sorteiu ba data no fatin hodi ajusta kandidatu sira” konklui.
Jornalista : Osória Marques
Editór : Zezito Silva

