DILI, 24 fevereiru 2022 (TATOLI) – Seketária Komisaun Nasionál Eleisaun (CNE-sigla portugés), Odete Maria Belo, informa CNE hamutuk ho lia-nain Dili realiza aktu ritual kulturál atu fó kbiit ba kandidatu PR iha kampaña eleitorál no eleisaun prezidensiál.
“Serimónia rituál ida-ne’e atu lia-na’in sira hamulak ba matebian, beiala sira no uma-lisan atu nune’e fó matak malirin no bele fó forsa no kbiit natureza ba kandidatu PR sira nune’e sira tuun halo kampaña bele la’o ho di’ak no labele hamosu liafuan kroat ba malu no labele insulta malu maibé respeita malu hanesan timoroan hodi tane interese nasaun no povu ida-ne’e“, Odete ba jornalista sira, iha Auditóriu CNE, ohin.
Tuir nia, atu kampaña no eleisaun ne’e la’o di’ak, livre no justu mak órgaun eleitorál realiza rituál ba munisípiu hotu-hotu inklui Rejiaun Administrativa Espesiál Oé-cusse Ambeno (RAEOA) ne’ebé komesa horiseik (23/02), no Díli ohin.
“Ohin ita haree tiha ona tanba prosesu kulturál komesa la’o horseik ho rezultadu di’ak depois rezultadu sei hato’o iha loron 28 fevereiru no sei hato’o pontu importante sira nune’e sei taka ho paktu pasífiku no hetan asinatura entre kandidatu sira hanesan aktu komprimisu ba kandidatu sira”, nia dehan.
Ho ne’e, CNE husu atu sidadaun hothotu kontribui ba pás no estabilidade no tuir regra no korridór sira ne’ebé mak iha no labele halo proganda.
Lian-nain hosi munisípiu Díli, Eugénio Sarmento, hateten atividade rituál atu fó matak malirin ba kadidatu sira, evita liafuan kroat iha ámbitu kampaña polítika.
“Ohin formalmente no tradisionalmente halo juramentu ida ba aman Maromak leten aas ba liuhosi beiala sira iha mama-fatin lalook ne’e siginifika katak sira tenke respeita malu labele buka atu hatuun malu no labele kria dezentendiemntu liuhosi liafuan kraot sira no mós husu matak malirin ba povu Timor-Leste tomak prinsipál iha Munisípiu Dili katak iha prosesu kampaña laran avo sira reza ba maromak atu ajuda ita nune’e labele hetan dezastre”, katak.
Tuir nia, informasaun katak manu aten (uat) ne’ebé iha failansu oituan maibé hadia ona no buat hotu mesak di’ak.
Jornalista : Osória Marques
Editór : Zezito Silva
