DILI, 28 fevereiru 2022 (TATOLI)—Sekretariu Estadu Arte no Kultura (SEAK), liuhosi Dirasaun Nasionál Patrimóniu Kulturál (DNPC, sigla portugés), adia verifikasaun ba uma lisan 120 iha Timor-Leste, tanba orsamentu ba deslokasaun sei prosesa.
Notísia relevante: SEAK sei halo verifikasaun ba uma lisan 120 iha territóriu nasionál
“Verifikasaun ba uma lisan 120 ami adia fila-fali ba loron 07 fulan-marsu, tanba orsamentu ba deslokasaun liuliu MOP (Ministériu Obras Publikas) dadaun ne’e sei prosesa hela, tanba ita-nia viajen ne’e ba toba semana ida iha terrenu entaun ita adia fali ba marsu, ne’ebé tarde mós iha loron 07 fulan-marsu ekipa sira tenke desloka ba kada munisípiu hodi halo verifikasaun”, Diretór Nasionál Patrimóniu Kulturál, Gil Paulino S. Oliveira, informa ba Tatoli iha nia knaar-fatin, Avenida Portugál, segunda ne’e.
Nia fundamenta, razaun seluk adia deslokasaun, tanba haree mós ba klimátika ne’ebé dadaun iha. Tanba, uma lisan 120 ne’ebé SEAK atu ba verifika nia lokalizasaun dook hosi sidade, hanesan área ne’ebé defísil asesu ba transporte.
“Tanba ne’e, ami muda uituan lai hodi haree ita-nia situasaun klíma, se metodolojia dehan bele halo ona movimentasaun iha área sira ne’ebé identifikadu risku, entaun ita-nia ekipa sira tun ba ona”, nia katak.
Iha prosesu verifikasaun ne’e, Dirasaun Nasionál Patrimóniu Kulturál fahe ona ba ekipa haat, hanesan balun ba rejiaun I, II, III no IV.
“Hanesan, ita-nia ekipa dahuluk sei toma konta hosi rejiaun ne’ebé kobre ba munisípiu Manatutu to’o Lautem durante loron ualu. Enkuantu, ekipa daruak sei ba rejiaun ne’ebé toma konta iha munisípiu Aileu, Ainaru no Manufahi durante loron neen”, nia dehan.
Ekipa datoluk sei ba rejiaun ne’ebé toma konta ba munisípiu Likisá, Ermera, Bobonaru no Kovalima durante loron ualu. Nune’e, mós ekipa dahaat sei ba iha Rejiaun Administrativa Espesiál Oé-Cusse Ambenu (RAEOA).
“Maibé, iha tinan ne’e proposta hosi Oé-Cusse nia seidauk tama, entaun ita rezerva de’it karik sira-nia proposta tama sedu, tanba ne’e ami presiza haree ba tempu kuandu la’o normál ona ekipa tun ne’e hodi efetivu loloos”, nia afirma.
Jornalista : Nelia Fernandes
Editora : Rita Almeida
