LIQUIÇA, 04 marsu 2022 (TATOLI)—Kandidatu Prezidente Repúblika períodu 2022 to’o 2027, ho númeru sorteiu 6, Francisco Guterres Lú-Olo, sesta ne’e, hala’o kampaña datoluk ho tipu komisiu iha kampu futeból Liquiça, munisípiu Liquiça.
Molok hala’o kampaña abarta kandidatu hosi Partidu FRETILIN ne’e akompaña ho espoza Cidália Nobre Guterres, Sekretáriu-Jerál Mari Alkatiri no Kordonedór kampaña José Manuel Nakfila, presta omenajen ba eroi sira iha Jardim Liquiça.
Iha ámbitu kampaña, Kandidatu Prezidente Francisco Guterres Lú-Olo hato’o kompromisiu atu kontinua normaliza instituisuan Estadu no koopera órgaun soberania sira seluk hanesan Governu, Parlamentu Nasionál no Tribunál Rekursu atubele garante pás no estabilidade hodi dezenvolve Timor-Leste.
“Ha’u sai nafatin Prezidente Repúblika iha períodu 2022 -2027 mak ha’u nia kompromisu mak nafatin garante normalizasaun instituisaun Estadu nian no koopera ho órgaun soberania sira seluk hotu atubele garante pás no estabilidade iha ita-nia rain hodi hala’o dezenvolvimentu atu hatan nesesidade povu nian,”Kandidatu PR Lú-olo hateten iha kampaña aberta iha Liquiça.
Nune’e, Kandidatu PR ne’e husu ba Liquiça-oan atu nafatin vota nian iha númeru sorteiu 6 hodi manán iha eleisaun atu sai Prezidente ba Timor-Leste no ba povu tomak iha períodu 2022 to’o 2027.
Kandidatu Lú-Olo hatutan katak sei respeita órgaun soberania sira seluk ninia funsaun hanesan kna’ar Parlamentu Nasionál ne’e deputadu sira mak hala’o, kna’ar ezekutivu ne’e membru Governu mak hala’o. Tanba ne’e labele halo promesa atu hala’o kna’ar ne’ebé la’ós Prezidente Repúblika nia kompeténsia.
Nune’e, Eleitu ba Prezidente Repúblika sei kontinua serbisu hamutuk ho Governu no Parlamentu Nasionál atu haluan polítika inkluzaun no kria kondisaun ba partisipasaun iha prosesu dezenvolvimentu la haree ba kondisaun sosiál ema ida-idak ninian.
Kandidatu ne’e hateten katak se eleitu nu’udar Prezidente Repúblika bele halo ligasaun governu ne’ebé Timor-Leste iha relasaun diplomátika la depende ba ema ida tanba Xefe Estadu mak diplomata ida aas liu país ida nian.
Durante asume kargu nu’udar Xefe Estadu, Lú Olo fó prioridade hametin relasaun bilaterál ho país viziñu, Indonézia no Austrália, relasaun istórika no kultural ho Portugal, ONU no ASEAN.
Iha biban hanesan, Koordenadór FRETILIN Munisípiu Liquiça, LuÍs Lobato, hateten, juventude FRETILIN la hanesan tinan lima ba kotuk tanba daudaun ne’e FRETILIN domina ona juventude sira iha munisípiu liquiça ne’ebé kandidatu Lú-Olo sei manán no sai duni ba Prezidente Repúblika ba ema hotu.
“Dezenvolvimentu atu la’o di’ak no povu atu hetan moris di’ak só úniku FRETILIN mak ukun liuhosi Prezidente Repúblika Lú-olo. Tanba FRETILIN mak inisiadór ba prosesu tomak ukun rasik an,” Luís Lobato akresenta.
Iha kampaña aberta ne’e hetan partisipasaun másimu hosi militante no simpatizante FRETILIN hosi suku 23 iha munisípiu Liquiça no marka prezensa mós Prezidente Partidu Os Verdes Timor, reperzentan PUDD no Partidu Libertasaun Populár no organizasaun masa apoia FRETILIN no kandidatu PR Lú-Olo.
Entretantu, kampaña aberta hosi kandidatu ho númeru sorteiu 6 ne’e observa direta hosi observadór Internasionál no Nasionál, Komisaun Nasionál Eleisaun (CNE,sigla Portugés) nomós hetan seguransa másimu hosi Polisia Nasionál Timor-Leste (PNTL) munisípiu Liquiça.
Notísia relevante: Lu Olo sei halakon korrupsaun no dignifika estatuta RAEOA
Jornalista : Felicidade Ximenes
Editór : Florencio Miranda Ximenes
