DILI, 04 marsu 2022 (TATOLI)–Prezidente Komisaun Nasionál Eleisaun (CNE-sigla portuegés), José Agostinho da Costa Belo, informa iha semana dahuluk kandidatu Prezidente Repúblika períodu 2022-2027 sira hala’o abertura kampaña eleitorál to’o ohin loron ne’e, CNE rejista irregularidade barak.
Notísia Relevante: INDDICA observa labarik barak maka asiste iha kampaña
“Hosi abertura kampaña to’o sesta (04/03) ohin ne’e, kampaña la’o ho normál entermu seguransa, estabilidade maibé ita rejistu irregularidade barak. Ekipa sira presiza tau prioridade, mak dahuluk labarik sira involve iha kampaña eleitorál ho motivu oioin. Ida-ne’e kestaun ne’ebé presiza ita haree,” José Belo hateten ba jornalista sira, iha salaun CNE, Dili, sesta ne’e.
Tanba ne’e, nia husu ba ema hotu-hotu atu respeita kalendáriu ne’ebé mak iha, nune’e bele asegura di’ak liután prosesu kampaña eleitorál no nia husu atu evita mós mini-kampaña tanba iha lei laiha mini-kampaña.
“Ha’u husu ba sira atu respeita nafatin kalendáriu ne’ebé mak ita deside hamutuk ona ne’e, nune’e observedór nasionál no internasionál, seguransa no mídia sira, nune’e kampaña ne’e bele la’o ho di’ak no tuir nia dalan,” nia dehan.
Tanba rezultadu supervizaun kampaña eleitorál iha loron 02-03 marsu 2022, iha munisípiu Ermera simu ona keixa liga kampaña eleitorál (provokasaun hosi apoiante kandidatu balun), maibé kuaze kampaña hotu ne’ebé kandidatu sira realiza ne’e hetan seguransa másimu hosi Polísia Nasionál Timor-Leste (PNTL), no Provedória Direitu Umanu no Justisa (PDHJ-sigla portugés) no komissaun Direitu ba Labarik halo monitorizasaun ba kampaña hirak ne’e.
“Husu ba kandidatu no apoiante sira atu nafatin kontinua kumpre ba regra no prosedimentu sira ba kampaña nian, atu nune’e labele akontese insidente ka problema ne’ebé ita hotu la espera. Tanba foin dadauk ita haree fotografia kandidatu Prezidente Repúblika balun nian mosu iha kampaña eleitorál iha Ainaro no Grupu Arte Marsiál (GAM) bolu naran símbolu iha kampaña laran ne’e labele,” nia husu.
Aleinde ne’e, nia husu ba ekipa susesu no apoiante sira atu evita mobiliza militante hosi munisípiu ida ba munisípiu seluk, nune’e evita insulta malu no hadok an hodi prevene surtu COVID-19.
Notísia Relevante: Labarik hatais faru partidu nian tuir kampaña ne’e kontra regra
Jornalista : Osória Marques
Editór : Cancio Ximenes
