COVALIMA, 08 marsu 2022 (TATOLI)–Kandidatu Prezidente Repúblika ho númeru sorteiu 14, José Manuel Ramos Horta hateten, bainhira iha eleisaun prezidensiál 2022 mak povu fó fiar ba nia sai PR, nia sei kontinua pronunsia ba Governu tau prioridade hodi dada kadoras mai Timor-Leste.
“Ha’u iha obrigasaun ko’alia ho Governu, hamutuk ho Governu haree didiak prioritáriu nasionál tinan lima mai hodi kontinua polítika ne’ebé uluk AMP halo, hodi lori dezenvolvimentu ba munisipiu sira kompleta dada eletrisidade, bee-mos, hadi’a di’akliu setór agrikultura no mós dada kadoras mai iha Timor-Leste,” José manuel Ramos Horta hato’o iha nia kampaña ba dala-hitu (7) iha Kampu Ladi, munisipiu Covalima, tersa ne’e.
Kandidatu ne’e mós promete sei servisu hamutuk ho Governu fó ideia hodi dada investidór mai no sei dezenvolve fronteira tomak, no sei haree estratejia polítika ZEESM tanba oras ne’e daudaun númeru ki’ak aas iha Rejiaun Administrativa Espesial Oé-Cusse Ambeno (REOA).
Aleinde ne’e mós sei aumenta produsaun kafé, tanba oras ne’e daudaun povu kuda mak maek maibé kafé mós importante sei ko’alia ho Governu kona-ba asuntu hirak ne’e.
Kompeténsia Prezidente Repúblika bazea ba konstituisaun, nune’e nia sei halo diálogu ho partidu politiku, sosiedade no igreja tenke kontinua ezemplu rekonsiliasaun hodi simu-malu labele iha violénsia entre joven sira sei servisu hamutuk ho arte rituál sira kontribui hametin dame iha rai ida-ne’e
Maske hala’o deznvolvimentu la’ós kompeténsia ida hosi Prezidente Repúblika, maibé nu’udar Xefe Estadu sei koordena ho Govenru hodi fó prioridade ba dezenvolvimentu área prioridade sira-ne’ebé mak fó benefísiu ba povu nia moris loro-loron.
Vise Prezidente Partidu CNRT, Gil da Costa ‘Oan Soru’, husu militante sira labele marka prezensa de’it maibé tenke marka istória iha fuan tanba Estadu Timor-Leste hein hela.
Iha kampaña eleitorál ba dala-hitu ne’e, hetan partisipasaun másimu hosi militante no simpatizante iha munisípiu Covalima.
Iha komísiu ne’e superviziona hosi Komisaun Nasionál Eleisaun, Provedoria Direitu Umanu no Justisa no obervadór internasionál hodi haree prosesu hotu, inklui Lei Eleitorál nian hodi bele fó susesu ba iha kampaña tinan ida-ne’e, no hetan apoiu seguransa hosi PNTL.
Jornalista : Celestina Teles
Editór : Cancio Ximenes
