DILI, 10 marsu 2022 (TATOLI)–Prezidente Konsellu Administrsaun Bee Timor-Leste, Empreza Públika (BTL, EP), Carlos Peloi dos Reis, hateten Governu liuhosi Ministériu Obras Públika (MOP) rekoñese komunidade seidauk asesu bee-moos.
”Ita rekoñese komunidade seidauk asesu ba bee-moos tanba ida-ne’e ita kontinua esforsu hodi promove liuhosi projetu foun ba territóriu no aleinde ne’e ita mós mantein servisu sistema operasaun ba sistema bee la’o ho di’ak, nune’e ita-nia komunidade bele asesu iha oras 24 nia-laran, tanba bee kanu dala barak estraga barak iha dalan públiku tanba ema ko’a hodi fase karreta no motór. Enves bee ne’ebé mak ita esforsu tau aimoruk ne’e hodi hemu lae, komunidade hodi fase fali karreta,” Prezidente Konsellu Administrsaun Bee Timor-Leste, Empreza Públika (BTL, EP) ne’e hateten ba jornalista sira hafoin partisipa iha serimónia “Rreflesaun Krítiku ba Impementasaun Auditória Sosiál’, iha salaun João II Comoro, Dili, kinta ne’e.
Kestaun ne’e, nia hateten, Bee Timor-Leste, Empreza Públika (BTL, E.P) orienta ona ekipa téknika sira hodi kontrolla, nune’e bele haree kanu sira iha dalan públiku ne’ebé ema halo ku’ak ka hakotu.
Iha futuru Governu sei tau bee-moos sai prioridade númeru um no komunidade sei asesu bee-moos, tanba nia garante katak iha tinan ne’e Governu deside no sei investe tan osan millaun $17 hodi kontinua ba projetu ne’ebé mak hala’o tiha ona.
“Aleinde ida-ne’e ita sei promove tan projetu foun liu-liu iha área urbana iha kapitál postu nian iha projetu 30 no iha urbanu iha projetu 21, maibé ida-ne’e ita sei husu apoiu ba ita-nia parseiru internasionál no Organizasaun nasionál sira hodi sira reforsa bee iha área rurál,” nia dehan.
Bee Timor-Leste, E.P konitnua esforsu hamutuk ho parseiru sira liu-liu WetarAid, Care Internasionál Timor-Leste (CITL), JICA, DIFAT, Plan Internasionál Timor-Leste (PITL), tanba ho sira-nia apoiu hirak-ne’e kontribui ona ba komunidade.
Nune’e, nia husu apoiu ba xefe suku no estudante sira katak Estadu no parseriu sira oferese bee presiza tau matan no kuidadu, nune’e parte relevante sira haree fali asuntu seluk no kontinua ezije sidadaun hotu-hotu atu apoiu malu hodi kontolla no bele uza kle’ur.
“Ho ida-ne’e ita kontinua hametin no hadi’ak liután ita-nia kooperasaun hamutuk iha setór bee no saneamentu nian, tanba bee sai asuntu importante ida ba ita hotu nia responsabilidade,” nia dehan.
Diretór Ezekutivu Asosiasaun HAK, Xisto dos Santos, hateten bee asuntu importante maibé to’o agora komunidade seidauk asesu ho di’ak tanba ne’e presiza refleta.
“Ita-nia komunidade nia mentál sei tradisionál hela tanba rezultadu ne’ebé ami deskobre iha sosiedade, esforsu ne’ebé ami halo ba ita hotu inklui sira-ne’ebé ita deskobre ona mkatak komunidade nia problema ne’e hotu nia problema,” nia hateten.
Tanba, tuir nia, to’o agora komunidade iha área rurál seidauk asesu bee-moos ho di’ak no realidade ne’ebé mak iha katak komunidade kontinua asesu bee-merak hosi bee-mota tanba ida-ne’e hanesan situasaun real ne’ebé labele haketak hosi komunidade.
Ho kestaun bee-moos ne’e, iha relatóriu internasionál hatudu katak má nutrisaun kuaze 40% resin entaun ida-ne’e nu’udar prezente moruk ba ema hotu.
Jornalista : Osória Marques
Editór : Cancio Ximenes
