DILI, 11 marsu 2022 (TATOLI)—Sekretariadu Tékniku Adminitrasaun Eleitorál (STAE), sesta ne’e, distribui ona materiál ba eleisaun prezidensiál 2022 ba munisípiu sira iha Timor-Leste inklui Rejiaun Administrativa Espesiál Oé-Cusse Ambeno (RAEOA).
“Agora ita distribui ona materiál sensitivu no naun sensitivu ba eleisaun prezidensiál 2022 ba munisípiu sira no mós ba Oé-Cusse tanba ró mós preparadu ona no hein atu tula. Maibé husu ba autoridade lokál sira tenke tau responsabilidade, nune’e materiál hirak-ne’e seguru bainhira to’o Munisípiu, nune’e iha loron 19 marsu hodi bele halo eleisaun,” Diretór Jerál STAE, Acilino Manuel Branco, informa ba jornalista sira iha resintu STAE, sesta ne’e.
Bainhira to’o iha Munisípiu, STAE hein katak situasaun seguru nafatin no asegura materiál bele to’o iha Munisípiu, tanba to’o ona iha momentu importante hodi STAE halo distribuisaun materiál ne’e.
“Bulletin votu ne’ebé mak prodús hamutuk livru 19.462 ne’e, iha totál buletin votu hamutuk 963.600,” nia informa.
Transporte ne’ebé atu tula materiál eleisaun ne’e apoiu hosi patrimoniu Estadu no viatura Estadu hotu iha nível nasionál no munisípiu sira hamutuk karreta unidade 400 mak sei transporta hodi lori to’o ba iha sentru votasaun.
Tuir nia, daudaun ne’e materiál eleisaun ne’e sei transporta ba STAE munisípál sira iha territoriu laran, no tuir planu materiál hirak ne’e sei transporta ba kada sentru votasaun iha loron 18 marsu 2022.
Prezidente Komisaun Nasionál Eleisaun (CNE-sigla portugés), José Agostinho da Costa Belo, hateten prosesu eleisaun atu la’o di’ak presiza iha nia kualidade mak servisu hamutuk ho parte hotu-hotu.
“Ohin tama prosesu buletin votu distribui munisípiu ne’ebé seguru no asegura ho di’ak liután to’o iha munisípiu sira, tanba ita iha seguransa hanesan PNTL munisipál sira mós akompaña materiál ne’e,” nia dehan.
Ministru Administrasaun Estatál (MAE), Miguel Pereira de Carvalho, hateten distribuisaun materiál sensitivu no naun sensitivu ba munisípiu sira-ne’e sai hanesan loron importante tanba nune’e sidadaun hotu-hotu bele ezerse ida-idak nia direitu votu.
“Ohin loron importante tanba loron ida-ne’ebé ita distribui, ita atu distribui materiál ba munisípiu sira hodi bele halo eleisaun ne’ebé akontese iha loron 19 marsu. Maibé iha distribuisaun ne’e, ita laiha dúvida tanba ita iha PNTL ne’ebé preparadu ona atu asegura ita-nia materiál ne’ebé sei distribui ne’e,” nia dehan.
Komandante Jerál Polísia Nasionál Timor-Leste (PNTL), Komisáriu Faustino da Costa, husu nafatin ba seguransa sira atu nafatin asegura materiál to’o iha fatin no fiar katak sei la akontese asidente ki’ik-oan sira.
“ita hotu hatene katak asesu ba dalan no transporte tenke garante katak materiál sensitivu no naun sensitivu to’o iha sentru votasaun laiha impedimentu ruma no ho razaun dehan ne’e dezastre no laiha razaun ida mak dehan sasán tarde, tanba asesu ba dalan ladi’ak maibé tenke garante to’o ho oras no tempu ne’ebé mak iha,” nia dehan.
Komisáriu nafatin alerta katak sé de’it no bainhira de’it atu hanoin estraga materiál iha sentru no estasaun sira no garante seguru no asegura iha oras 24 nia-laran.
STAE mós entrega materiál sensitivu no naun sensitivu ba diplomata sira ba diáspora nian hanesan Austrália, Portugal, Irlandia, Inglaterra no Korea.
Jornalista : Osória Marques
Editór : Cancio Ximenes
