Ohin, ekipa apoiu tékniku STAE-MNEK aranka ba diáspora

DILI, 14 marsu 2022 (TATOLI)—Diretór Jerál Sekretáriadu Tékniku Administrasaun Eleitorál (STAE), Acilino Manuel Branco, hateten ekipa apoiu tékniku hosi STAE no Minsitériu negósiu Estranjeiru no Kooperasaun (MNEK) hamutuk na’in-18, segunda (14/03) ne’e, aranka ona ba Austrália, Portugal, Reinu Unidu, Irlandia do Norte no Korea do Sul.
Notísia Relevante: Ekipa resensiamentu eleitorál iha diáspora rejista votante 367
“Ekipa apoiu tékniku hosi STAE no MNEK na’in-neen (6) mak aranka uluk ona iha tuku 07h00, voo ho Airnorth hodi transporta materiál sensitivu no naun sensitivu ba sentru tolu (3) hanesan Darwin, Sydney no Melbourne. Entretantu, ekipa seluk ne’ebé aranka ba Korea do Sul, Portugal, Irlandia do Norte no Reinu Unidu ne’e, voo ho Sriwijaya iha tuku 11h00 dadeer ne’e,” Diretór STAE ne’e hateten ba Agência TATOLI, iha nia knaar fatin Caicoli, Dili, segunda ne’e.
Nia dehan, ekipa ne’ebé ba Korea do Sul to’o iha aeroportu Bali kontinua ba Singapura to’o iha sentru ne’ebé mak atu hala’o eleisaun bá ne’e no ekipa ne’ebé ba Irlandia do Norte, Portugal no Reinu Unidu to’o iha aeroportu Jakarta, kontinua sira-nia viajen ba Europa.
“Ema na’in-rua hosi STAE no na’in-rua hosi MNEK ba Portugal, ema ida hosi STAE no ida hosi MNEK ba Korea do Sul no restante ne’e ba Reinu Unidu no Irlandia do Norte,” nia dehan.
Acilino Branco hateten, nia parte lahatene informasaun kona-ba ekipa supervizaun CNE atu aranka ba diaspora maibé ekipa ne’ebé atu atu aranka ba Austrália ne’e parese iha loron 16 marsu 2022.
Jornlista : Osória Marques
Editór : Cancio Ximenes

