Kandidatu PR Assanami hakarak lori TL sai fraternu, solidáriu no unidu

DÍLI, 16 marsu 2022 (TATOLI)–Mariano ‘Assanami’ Sabino, kandidatura Prezidente Repúblika ho númeru sorteiu 16 ne’ebé mai atu serbí país ida ne’e hodi lori prosperidade ba Timor-Leste no hakarak promove nasaun ida fraternu, solidáriu no unidu.

Notísia Relevante: Sai PR, Assanami loke palásiu ba povu-defende zona ekonomia RAEOA

Moris iha rai Luro, Munisípiu Lautém, iha 12 abril 1971. Mai ho responsabilidade atu fó kontinuasaun ba libertasaun nasionál no nu’udar transjerasionál no interjerasionál katak envolve ona iha rezisténsia ho líder tuan sira, lidera movimentu estudante no ba oin atu hasoru joven mileniál sira hodi hadi’ak sira-nian moris.

“Ba Estadu laiha liafuan lae, Maubere oan prontu atu serbí ne’e mai kedan husi tempu rezisténsia,” friza Presidente Partidu Demokrátiku ne’e sobre nia kandidatura.

Assanami, ema ida simpátiku no komunikativu ne’e, esplika katak nia hakarak atu assegura jerasaun foun no dignifika jerasaun tuan sira katak la mai atu kompete, maibé ho obrigasaun Maubisse I no II ne’ebé ko’alia sobre jerasionál.

“Motivu seluk mak atu halo hakmatek líder tuan sira tanba idade mós la’o bá daudaun ona, maibé sira sente kalma tanba joven ida ne’ebé maka hola parte hamutuk ho sira iha pasadu no ohin prontu atu fó kontinuidade ba mehi eroi, líder tuan no povu sira-nian ba oin,” afirma lisensiadu iha Agrikultura husi Universidade Brawijaya Malang, Indonézia no Siénsia Polítika iha Universidade Waskita Dharma Malang.

Envolve an iha organizasaun rezisténsia

Kandidatura Xefe Estadu ne’e envlove iha Rezisténsia Nasionál Estudante Timor-Leste (RENETIL) iha 1991 bainhira kontinua nia estudu iha Universidade Brawijawa Malang, Indonezia. Okupa pozisaun oioin iha RENETIL no ikus liu nu’udar Vise Sekretáriu-Jerál RENETIL no saudozu Fernando Lasama hanesan Sekretáriu-Jerál iha momentu ne’ebá.

Hetan fiar mós hodi okupa pozisaun iha organizasaun Ikatan Mahasiswa dan Pelajar Timor-Timur IMPETTU no seluk tan.

Nia hanesan fundadór ba Prezedium Juventude Loriku Asua’in (PJLA) hanesan ko-koordenador PJLA tuir enkontru rekonsiliasaun DARE II iha Jakarta.

Líder PD ne’e hola parte iha asaun barak no risku ba auto determinasaun Timor-Leste nian iha embaixada Rúsia iha Jakarta iha 1995, iha embaixada Austria iha 1997 no iha Ministériu Negósiu Estranjeiru Indonézia iha 1998.

Tanba halo asaun protesta iha tempu okupasaun Indonéziu, Assanami sempre hetan detensaun husi autoridade militar país refere. Iha 1999, hafoin fila mai Timor-Leste, Assanami prepara no mobiliza povu ba iha referendu hodi hili ukun-rasik-na.

Komisaun Planeamentu no Koordenasaun Kampaña (CPCC, sigla portugés) husi Konsellu Nasionál Rezisténsia Timorense (CNRT) nomeia nia ba Responsavel Departamentu Mobilizasaun CPCC nian, hodi mobiliza timoroan tomak ba iha referendu hodi hili ukun-an.

Iha tempu ukun-an

Assanami hahú nia knaar nu’udar asesór iha National Planning Development Agency Nasaun Unida nian. Iha 2001, hamutuk ho ninia kompañeiru sira, harii Partidu Demokráticu (PD).

Assume funsaun, iha 2007, nu’udar Prezidente ba Aliansa Maioria Parlamentar (AMP) ne’ebé forma husi Governu Konstitusionál IV ho membro sira mak CNRT, PD, ASDT no PSD.

Iha Govenru IV no V nia asume pasta hanesan Ministru Agrikultura e Peska. Iha Governu VII asume kargu Ministru Estadu no Rekursu Minerál. Atulmente, nu’udar deputadu iha Parlamento Nasionál

Kandidatu ne’e mai ho misaun no vizaun ida ba Timor-Leste. Hakarak halo nasaun ne’e sai modernu, sivilizadu, demokrátiku, ho povu ida moris dignu no no halo Timor-Leste sai nasaun ida forte no estratejiku iha rejiaun Ázia no mundu.

“Hakarak timor-oan sira hotu hamutuk harii Timór foun ida ba timoroan tomak. Hun ida, abut ida, povu ida, rai Timór ida de’it. Hakarak Timór ida fraternu, solidáriu, unidu, justu, no prósperu. Moris hamutuk iha dame, sein halo dirkriminasaun ba malu”.

Kandidatu ida-ne’e sempre defende unidade, diálogu, rekonsiliasaun, dezenvolvimentu no identidade nasionál tanba hatene katak konstrusaun Estadu tenke hatuur iha pontu hirak ne’e.

“Tanba ne’e, ha’u-nian kandidatu, kandidatu povu nian no sai prezidente povu nian,” konklui.

Notísia Relevante: Kandidatu PR Assanami hakarak hadi’a ekonomia ba bem estar povu

Jornalista : Maria Auxiliadora  

Editór      : Cancio Ximenes