DILI, 16 marsu 2022 (TATOLI)—Sekretária Estadu Arte no Kultura (SEAK) liuhosi Dirasaun Nasionál Patrimóniu Kulturál (DNPC, sigla portugés), iha fulan ne’e hahú verifika ona uma lisan 119 iha territóriu nasionál.
Notísia Relevante: SEAK adia verifikasaun uma lisan 120 iha Timor-Leste
“Iha loron 04 dulan-marsu ne’e, ami hahú verifika ona uma-lisan 119, nune’e ekipa rejiaun I komesa hala’o ona nia verifikasaun iha baze tama ona iha munisípiu Manatuto, Baucau, Viqueque no Lospalos, ne’ebé daudaun ne’e ekipa sira halo hela verifikasaun iha terrenu,” Diretór Nasionál Patrimóniu Kulturál, Gil Paulino S. Oliveira, informa ba Agência Tatoli iha nia knar fatin, Avenida Portugal, Dili, kuarta ne’e.
Nia informa, ba ekipa III dezloka on aba rejiaun III hodi identifika uma-lisan iha munisipiu Liquiça, Ermera, Bobonaro no Covalima.
Iha semana oin, hafoin eleisaun ne’e ekipa daruak (II) sei ba fali iha munisípiu Aileu, Ainaro no Manufahi, inklui Dili ne’ebé sei halo verifikasaun iha Atauro, no ba RAEOA, tinan ne’e la iha proposta, entaun ekipa la ba halo verifikasaun,” diretór ne’e informa.
Iha prosesu verifikasaun ne’e, nia dehan, Dirasaun Nasionál Patrimóniu Kulturál nia planu antes tama iha fulan abril, dadus sira ne’e tenke tama hotu ona nune’e iha 22 no 23 fulan marsu ne’e rezultadu verifikasaun tama hotu ona iha dirasaun nasionál patrimóniu kulturál, nune’e komisaun avaliadór sira sei avalia.
Daudaun ne’e ekipa ba halo verifikasaun ba uma lisan hamutuk 119 proposta, tanba antes ne’e proposta tama hamutuk 120 maibé bainhira ekipa halo avaliasaun iha proposta ida la prenxe rekezitu, tanba proposta ne’e hakerek materiál modernu entaun proposta ne’e la pasa, entaun daudaun ne’e ekipa halo verifikasaun ba proposta hamutuk 119.
“Hosi rezultadu verifikasaun mak ita foin hatene hosi 119 ne’e bele mós tun mai iha 110 ka la to’o tan 100-resin. Ida-ne’e depende tanba ekipa sira tun ba sira sei haree rezultadu preparasaun iha baze ne’e oinsá. Ne’ebé, ita haree iha 23 ka 24 marsu mak ekipa bele hatene proposta hira mak atu enkamiña ba komisaun avaliadór hodi halo avalia, nune’e bele tama ba prosesu apoia,” nia afirma.
Jornalista : Nelia Fernandes
Editór : Cancio Ximenes
