AILEU, 18 marsu 2022 (TATOLI)—Xefi Suku Aisirimou, Munisípiu Aileu Vila, Sabino Lere, hatete suku ne’e simu ona materiál sensitivu no la’os sensitivu ba eleisaun prezidensiál husi Sekretariadu Tékniku Administrasaun Eleitorál (STAE).
“Materiál sira ne’ebe aban atu utiliza ba eleisaun ne’e, foin tama mai iha tuku 12:00. Materiál sira ne’e entrega husi ekipa STAE, ba aldeia lima. Iha fatin ne’e iha sentru votasaun mak, sede suku Aisirimou, Besilau, Sarlala no Aitohularan”, hateten Sabino Lere ba jornalista iha nia kna’ar fatin, Aisirimou, munisípiu Ailéu Villa, sesta ne’e.
Nia informa, antes ne’e autoridade suku hala’o ona enkontru ho ekipa STAE hodi prepara fatin votasaun no materiál ba eleisaun prezidensiál ne’ebé sei hala’o iha loron 19 marsu tinan 2022.
“Sede suku Aisirimou rasik, ami simu husi aldeia rua, ne’ebé sei konsentra iha ne’e. Aldeia tolu seluk sei ba iha idak-idak nia aldeia tanba sira nia distansia dook husi suku”, nia deklara.
Nia hatutan, materiál refere agora dadauk rai iha eskola fatin no membru eskuadra PNTL Aileu mak fó seguransa másima hodi asegura materiál sensitivu no la’ós-sensitivu hirak ne’e.
“Suku Aisirimou iha totál populasaun 3.422, husi labarik to’o ema bo’ot. Maibé sira ne’ebé mak atu tuir eleisaun, STAE seidauk fó lista mai”, nia dehan.
Sabino hatutan tan katak kada tinan kuandu loron eleisaun, STAE fó lista antes eleisaun maibé iha tinan ida ne’e suku Aisirimou seidauk simu lista votante husi STAE. Nune’e hafoin eleisaun hotu foin bele hatene totál votantes ne’ebé partisipa eleisaun.
Jornalista : Mirandolina Barros Soares
Editora : Armandina Moniz
