DILI, 19 marsu 2022 (TATOLI)-Kandidatu Prezidente Repúblika ho númeru sorteiu 10, Antero Bendito da Silva, ne’ebé ezerse ona direitu votu iha sentru votasaun suku Madohi, postu administrativu Don Aleixo, munisípiu Dili, hatete fiar katak sei hetan votu ne’ebé signifikante.
Antero vota iha sentru votasaun eskola 30 agostu Komoro, iha tuku 7.45.
Dosente Universidade Nasionál Timor Lorosa’e (UNTL) ne’e hato’o ninia deseju no parabéns ba povu tomak ne’ebé partisipa ona eventu demokrátiku ne’e ho esperansa eleisaun sei lori estabilidade, dame iha prosesu dezenvolvimentu ne’ebé justu ba povu tomak.
“Parabéns ba povu tomak ne’ebé ohin hili ona Prezidente Repúblika liuhosi votu sekredu. Espera eleisaun prezidensiál sei lori estabilidade no dame ba ita hotu”, dehan nia ba TATOLI iha sentru votasaun hafoin vota, sábadu ne’e.
Nia informa, karik la manán iha eleisaun prezidensiál maibé tempu barak kompete nafatin iha eleisaun prezidensiál períodu tuir mai.
Antero dehan sei partisipa eleisaun parlamentár ne’ebé akontese iha 2023 liuhosi movimentu polítiku ho prosesu inskrisaun ba organizasaun Konsellu Nasionál Rezisténsia Maubere (CNRM, sigla portugés) hanesan forsa partidu polítiku hodi kompete iha eleisaun parlamentár 2023.
“Tempu badak ami sei hahú prosesu foun ba rejistu movimentu frente CNRM hanesan partidu polítiku ida hamutuk ho joven sira ne’ebé ami prepara ona iha eleisaun prezidensiál hodi involve iha eleisaun parlamentár hodi kontribui ba prosesu dezenvolvimentu iha Timor-Leste”, nia akresenta.
Hanesan kandidatu nia espera tinan ne’e tenke halo mudansa ruma ba involvementu polítiku jerasaun foun ne’ebé bele mosu ho determinasaun ho espíritu revolusionáriu hodi involve án iha polítiku hodi halo mundansa ne’ebé signifikante ba Timor–Leste nian dezenvolvimentu.
Jornalista : Camilio de Sousa
Editora : Rita Almeida
