DILI, 25 marsu de 2022 (TATOLI)–Komisaun Nasionál Eleisaun (CNE, sigla portugés), sesta (25/03) ne’e, iha tuku 14h00 konklui apuramentu nasionál ba votu nulu no reklamadu sira-ne’ebé rejista hosi sentru votasaun 1.200 no estasaun votasaun 1.500 iha territóriu nasionál.
Notísia Relevante: Apuramentu nasionál: CNE konklui ona munisípiu Aileu no Ainaro
Prezidente Komisaun Nasionál Eleisaun, José Agustinho da Costa Belo, hateten ohin ne’e CNE kumpre oras 72 nia laran hodi finaliza apuramentu nasionál ba eleisaun prezidensiál 2022, nune’e bele elabora akta hodi bele aprezenta ba Tribunál Rekursu.
“CNE kumpre oras 72 hodi termina apuramentu nasionál iha 25 marsu 2022, inklui Austrália atu bele elabora akta, atu nune’e bele aprezenta ba Tribunal de Rekursu,” José Agostinho da Costa Belo hateten ba jornalista sira iha Sala Konferénsia Imprénsa CNE, Caicoli, Dili.
Iha apuramentu nasionál ne’e, CNE konsege verifika votu nulu ka reklamadu hosi sentru votasaun 1.194 iha territóriu nasionál no Austrália ne’ebé sai validu hodi distribui ba kandidatu Prezidente Repúblika sira-ne’ebe merese atu hetan, maibé CNE seidauk iha númeru ne’ebé fiksu.
Prezidente CNE garantia sei elabora akta kona-ba apuramentu nasionál no sei públika iha edifísiu CNE, atu nune’e fiskais ba eleisaun bele aprezenta reklamasaun sira, maibé se laiha reklamasaun ba kata ne’ebe CNE sei taka iha edifísiu nasionál, CNE sei kontinua aprezenta ba iha Tribunal Rekursu.
Nia informa, CNE seidauk verifika akta ba sentru votasaun neen iha ka hosi diaspora hanesan hosi nasaun Korea do Sul, Inglaterra, Irlandia no Portugal, tanba akta sira-ne’e sei to’o iha Timor-Leste iha 27 marsu iha semana ne’e.
“Akta hosi diaspora ne’e sei rezolve bainhira to’o iha Timor-Leste, maibé CNE tenke kumpre oras determina hosi lei mak apuramentu nasionál tenke konklui iha 28 marsu 2022 iha tuku 14h00 lorokraik loloos,” nia dehan.
Antes ne’e, Sekretariadu Tékniku Administrasaun Eleitorál (STAE) rejista eleitór hamutuk 859.613 ba eleisaun Prezidente Repúlika ne’ebe eleitór 76,88 (660,858) tuir eleisaun kompostu hosi feto 321,392 no mane 339,466 (51,37).
Bazea ba rezultadu ikus ne’ebé Sekretariadu Tékniku Administrasaun Eleitorál (STAE) fó sai, Kandidatu Prezidente Repúblika (PR) hosi CNRT Jose Ramos Horta hetan votu 301,481 (46,58%), kandidatu PR hosi FRETILIN Francisco Guterres “Lu-Olo” hetan votu 143,408 (22,16%).
Kandidata hosi KHUNTO Armanda Berta dos Santos hetan votu 56,289 (8,70 %), kandidatu independente Lere Anan Timur hetan votus 48,959 votu (7,57%), kandidatu hosi PD Mariano Assanami Sabino hetan 47,008 votus (7,57%), kandidatu hosi PDRT Anacleto Bento Fereeira hetan 13,059 (2,02 %).
Kandidatu indendente Martinho da Silva Gusmao hetan votu 8,485 (1,31% ), kandidatu independente Hermes da Rosa Correia Barros hetan votu 7,58 (1,23%), kandidata indendente Milena Pires hetan votu 5,335 (0,082%), kandidata independente Isabel da Costa Ferreira hetan votu 4,165 (0,64%).
Kandidatu independente Felizberto Araújo Duarte hetan votu 2,615 (0,40 %) Constancio Pinto hetan votus 2,474 (0,38%), kandidatu independente Rogerio Tiago Lobato hetan votu 2,028 (0,31%), kandidatu independente Virgílio da Silva Guterres hetan votu 1,685 (0,26%), kandidatu independente Antero Benedito hetan votu 1,531 (0,24 %) no kandidata independente Ángela Freitas hetan votu 692 (0,11%).
Notísia Relevante: Ohin, STAE distribui materiál eleisaun ba sentru votasaun 1.200 iha territóriu nasionál
Jornalista : Jesuína Xavier
Editór : Cancio Ximenes
