DILI, 29 marsu 2022 (TATOLI)— Tribunál Rekursu (TR), tersa ne’e, valida rezultadu apuramentu nasionál iha primeira volta eleisaun prezidensiál no deside kandidatu José Ramos Horta no Francisco Guterres Lú-olo hakat ba segunda volta.
“Hafoin verifika votu apuramentu nasionál rezultadu eleisaun prezidensiál mai hosi CNE, ami halo analiza la hetan irregularidade no la simu reklamasaun ruma,” Prezidente Tribunál Rekursu, Deolindo dos Santos, hateten liuhosi anúnsiu rezultadu eleisaun prezidensiál 2022 too 2027 iha Caicoli-Dili.
Akordaun ne’e asina hosi juíz koletivu Jacinta Correia da Costa no Duarte Tilman Soares, ne’ebé konfirma rezultadu apuramentu ba votu efeitu ne’ebé realiza iha Timor-Leste no diáspora hosi Komisaun Nasionál Eleisaun (CNE,sigla Portugés).
Juíz koletivu hosi Tribunál Rekursu nota katak apuramentu ne’ebé CNE hala’o no rezultadu eleisaun laiha problema.
“Juíz koletiva deside laiha kandidatu ida maka hetan votu metade 50%+1 tanba ne’e mak laiha kandidatu entre na’in-16 maka manán absoluta. Nune’e iha kandidatu Prezidente Repúblika na’in-rua hanesan José Ramos Horta no Francisco Guterres Lu-Olo mak bele hakat ba segundu volta eleisaun Prezidensiál períodu 2022 to’o 2027,” Prezidente Deolindo akresenta.
Tanba, kandidatu na’in-rua mak hetan votu barak liu tuir lei artigu 76 Konstituisaun Repúblika Demokrátiku Timor-Leste no lei eleisaun prezidensiál artigu 48.
“Kandidatu rua ne’e maka fixa avansa ba eleisaun segunda volta. Rezultadu akordaun Tribunál Rekursu sei públika iha jornál Repúblika,” nia informa.
Tuir planu, hahú aban (30/03), Tribunál Rekursu realiza dada sorteiu entre kandidatu Prezidente Repúblika Jose Ramos Horta no Francisco Guterres Lú-Olo.
Bazeia ba akordaun final ba rezultadu eleisaun prezidensiál períodu 2022 too 2027, kadidatu Prezidente Repúblika ne’ebe hetan votu barak liu maka, José Ramos Horta ho númeru sorteiu 16 ho votu 303.477 (46,6%), Francisco Guterres Lu-Olo ho votu 144.282 (22,1%), Armanda Berta dos Santos 56. 690 (8,7%), Tito da Costa Cristovão “Lere Anan Timur” 49.314 (7,6%), Mariano Assanami Lopes Sabino 47.334 (7,3%), Anacleto Bento Perreira 13. 205 (2,0%).
Martinho Germano da Silva Gusmão 8.598 (1,3%), Hermes da Rosa Correia Barros 8.030 (1,2%), Maria Helena Lopes de Jesus Pires 5.430 (0,8%), Isabel da Costa Ferreira 4.219 (0,6%), Felizberto Araújo Duarte da Silva 2.709 (0,4%), Constancio da Costa Pinto ‘Terus’ ho votu 2.520 (0,4%), Rogerio Tiago de Fatima Lobato 2.050 (0,3%), Virgilio da Silva Guterres ‘ Lamukan’ 1.720 (0,3%), Antero Bendito da Silva 1.562 (0,2%) no Maria Angela Freitas da Silva 711 (0,1)%.
TR mós halo verifikasaun ba totál eleitór ne’ebé partisipa iha eleisaun prezidensiál iha 19 marsu hamutuk 664.106, hosi eleitór ne’ebe rejistradu 856.613. Enkuantu votu validu 651.859 (98,16%), votu branku 3.743 (0,56%), votu nulu 8.386 (1,26%), votu rejeitadu 65 (0,01%).
Notísia relevante: CNE submete ona rezultadu apuramentu nasionál ba Tribunál Rekursu
Jornalista: Natalino Costa
Editór : Florencio Miranda Ximenes
