DILI, 31 marsu 2022 (TATOLI)- Ekipa delegasaun hosi Federasaun Futeból Timor- Leste (FFTL) ne’ebé lidera hosi Prezidente Francisco Jerónimo hasoru malu ho Prezidente Asian Football Confederation (AFC), Sheikh Salman iha Qatar, kuarta (30/03).
Iha sorumutuk ne’e, Prezidente AFC apreseia ho servisu FFTL nian durante tinan haat ne’ebe la’o di’ak tebes iha área futeból.
“Presidente AFC apresia serbisu FFTL nian durante tinan haat no mós aprova ona Advantage Fund ou Fundo Advatanjen ba Timor Leste hodi desenvolve atividade ne’ebé la kobre hosi fundu ne’ebé durante AFC fo ba FFTL,” Prezidente FFTL hateten ba Agência TATOLI via rede sosiál, kuarta ne’e.
Notísia relevante:FIFA louva FFTL tanba futeból TL hatudu progresu di’ak
Delegasaun FFTL mós apresia desizaun Presidente AFC no konvida mós Presidente AFC atu vizita Timor-Leste hodi haree direta dezenvolvimento futeból iha Timor-Leste no saida deit mak sai preokupasaun iha nasaun ne’e liuliu futeból.
Ho nune’e, Prezidente AFC promete sei buka tempu atu vizita Timor-Leste iha tempu besik.
“Fundu permanente $500.000 kada tinan, ita simu hosi AFC, maibe tinan ida ne’e, Prezidente AFC deside fó tan $200.000 bainhira Ami hasoru malu hodi diskute programa sira ne’ebé prioridade mai hosi fundu advantage,” atual Ministru Asuntu Parlamentar no Komunikasaun Sosial (MAPKOMS) ne’e afirma.
Tuir orariu, Ohin (31/03), delegasaun FFTL sei partisipa kongresu anual FIFA nian ne’ebé sei halao iha Qatar.
Notísia relevante:2021, FIFA ho AFC redús apoiu orsamentu ba FFTL
Jornalista: Hortencio Sanchez
Editór : Florencio Miranda Ximenes
