DILI, 06 abríl 2022 (TATOLI)— Komisaun E ne’ebé trata asuntu infraestrutura iha Parlamentu Nasionál, kuarta ne’e, hala’o audénsia ho Operadór Telekomunikasaun tolu hanesan Timor Telecom (TT), Telekomsel no Telemor, hodi husu atu oferese servisu di’ak ba sidadaun sira liuhosi hadi’ak rede intenet.
Prezidente Interinu Komisaun E, Deputadu Fabião de Oliveira, hateten Komisaun E bolu operadór telekomunikasaun tolu ne’e atu hodi husu klarifiksaun kona-ba rede internet ne’ebé problema hela de’it no prejudika ba kliente sira hala’o serbisu.
“Ohin, ami bolu operadór tolu ne’ebé eziste iha Timor-Leste atu klarifika no iha sira nia esplikasaun katak liña internet Timor nian hetan problema no sira sei buka atu rezolve iha tempu badak,” Prezidente Komisaun E ne’e hateten hafoin audensia ho Dirijente Operadór Telekomuniaksaun tolu ne’e, iha Parlamentu Nasionál.
Notísia relevante: Utilizadór servisu finanseira dijitál husu operadór hadi’ak rede internet
Nia dehan operadór telekomunikasaun tolu ne’e mós rekomenda ba Komisaun E katak atu rezolve problema rede internet dalan úniku mak Governu aselera projetu kabu submarine atubele garante kualidade rede internet iha Timor-Leste.
Iha biban hanesan, Diretór Ezekutivu Timor Telecom (TT), Manuel Cárceres, informa Komisaun E Parlamentu Nasional maka hato’o konvite ba Operadór sira atu mai partilla informsaun kona-ba rede internet ne’ebé hetan problema iha Timor-Leste.
“Durante ne’e liña internet lentu duni tanba internet iha ita-nia rai ne’e la’o seidauk too iha nivél satisfasaun ida que halo ita-nia kliente sira kontente. Ne’e realidade ida que operadór na’in-tolu la subar no rekoñese. Nune’e ita buka solusaun atubele rezolve tiha internet iha ita-nia rai,” nia kompromete.
Operadór Telekomuniasaun tolu ne’e mós simu preokupasaun no lamentasaun sira hosi kliente no daudaun ne’e buka ona dalan atu resolve. Maibe dalan di’ak liu atu rezolve mak tenke dada ona kabu submarinu
“Ami simu preokupasaun sira ne’e, no ami mós rekoñese katak iha duni problema ho internet iha ita-nia rai no ami mós hato’o ba Deputadu sira atu hatutan ba governu hodi bele dada lalais kabu subrmarinu,” nia afirma.
Eis Ministru Justisa ne’e dehan, rede internet iha Timor-Leste ne’e operadór Telekomunikasaun tolu ne’e uza satellite no Telekomcel nian hodi dada hosi fronteira.
“Ami esforsu-an nafatin atu hadia kualidade la’ós ba internet de’it, maibé kualidade rede sira hodu, hodi fó satisfasaun ba ita-nia populasaun sira,” nia afirma.
Notísia relevante: TANE Konsumidór husu operadór telekomunikasaun oferese servisu di’ak ba sidadaun
Jornalista: Natalino Costa
Editór : Florencio Miranda Ximenes
