Aban, MAE sei distribui materiál eletrónika ba RAEOA
DILI, 07 abríl 2022 (TATOLI)—Vise Ministru Administrasaun Estatál (MAE), Lino de Jesus Torrezão, hateten tuir planu aban (sesta, 08 marsu) MAE sei distribui materiál eletrónika hanesan komputadór 18, CPU 18 no mákina emprime 18 ba Rejiaun Administrativa Espesiál Oé-Cusse Ambeno (RAEOA).
Notísia Relevante: MAE distribui materiál eletrónika ba xefe suku sira iha Dili
“Aban, ha’u rasik mak sei ba RAEOA hodi fahe materiál eletrónika ba ita-nia xefe suku sira iha ne’ebá,” Governante ne’e hateten ba Agência TATOLI, iha nia knar fatin Colmera, Dili, kinta ne’e.
Ba suku sira iha territóriu nasionál ne’ebé mak seidauk simu materiál eletrónika ne’e tanba MAE sei hatama sistema ba komputadór sira, nune’e ajuda no fasilita xefe suku sira hala’o’ sira-nia knar loro-loron nian.
“Ita entrega materiál ne’e ho fazeadamente ba xefe suku sira, tanba MAE sei hatama Sistema. Nune’e, bainira sira simu ne’e halo servisu de’it ona, la’ós simu simultanea tanba ne’e informasaun ne’ebé fó sai katak seidauk simu ne’e, husu atu hein. La kleur tan sei to’o iha ita-boot sira-nia fatin,” nia dehan.
To’o oras ne’e, nia informa, MAE seidauk distribui materiál eletróniku ba munisípiu Laútem, Bobonaro, Covalima no Manufahi maibé munisípiu seluk ne’e Governu distribui hotu ona.
Notísia Relevante: Suku Camanasa seidauk simu materiál eletróniku hosi Governu
Jornalista : Osória Marques
Editór : Cancio Ximenes
