DILI, 12 abril 2022 (TATOLI)—Sekretaria Estadu Arte no Kultura (SEAK) liuhosi Dirasaun Nasionál Patrimóniu Kulturál (DNPC, sigla portugés), iha abríl ne’e, sei halo sinalizasaun ba patrimóniu arkitektóniku orijen portugés iha kapitál Dili.
Notísia Relevante: Governu Prezerva Patrimóniu Arkitektóniku Orijin
“Fulan ne’e, ami sei halo sinalizasaun ba patrimóniu arkitektóniku orijen portugés nian iha Dili. Agora prosesu la’o ona. Hein semana ne’e nia laran, bainhira prosesu pagamentu finaliza ona mak ami sei implementa programa ne’e,” Diretór Nasionál Patrimóniu Kulturál, Gil Paulino Santos Oliveira, hateten ba Agência Tatoli, iha nia knar fatin Avenida Portugal, Pantai Kelapa, Dili, tersa ne’e.
Objetivu hosi programa ne’e atu fó informasaun ba públiku katak uma orijen portugés nian ne’ebé lokaliza iha kapitál Dili ne’e, nia valór istóriku presiza atu prezerva no konserva nafatin nia orijinalidade atu labele lakon nia istória.
Iha sinalizasaun ne’e mós bazea ba regulamentu ho dekrelu-lei númeru 33 rejime juridiku patrimóniu kulturál, liga ba oinsá atu halo prezervasaun salvaguarda ba patrimóniu arkitektóniku orijen portugés ne’ebé lokaliza iha Dili.
Tuir nia, plaka sinalizasaun ne’e kompañia prepara hotu ona no agora iha ona prosesu pagamentu ba parte kompañia, maibé bainhira pagamentu realiza ona iha tempu ne’e kedas hahú ona ho montazen plaka sinalizasaun ba arkitektóniku orijen portugés nian iha Dili.
“Iha sítiu lima (5) mak sei monta plaka sinalizasaun mak hanesan iha área Dioseze Dili, Palásiu Governu no Faról, tanba Faról uma orijen portugés ne’e barak tebes,” nia dehan.
Notísia Relevante: Governu sei konserva abrigu Japonés iha Timor-Leste
Jornalista : Nelia Fernandes
Editór : Cancio Ximenes
