DILI, 19 abril 2022 (TATOLI)—Jestór Sentru Izolamentu Vera Crúz, Orlando da Costa informa, tersa ne’e, pesoál saúde hamutuk 38 iha sentru izolamentu COVID-19 Vera Crúz ezerse sira-nia direitu votu iha eleisaun prezidensiál segunda volta tanba laiha ona pasiente COVID-19 ne’ebé mak daudaun ne’e baixa iha sentru izolamentu refere.
Notísia Relevante: Pasiente no profisionál saúde na’in-750 ezerse direitu votu iha HNGV
“Ita-nia pesoál saúde iha sentru izolamentu Vera Crúz hamutuk 38 ne’ebé kompostu hosi Médiku, Infermeiru, Parteira, Analista, Farmásista, inklui sira-ne’ebé hadi’a jeradór, hosi númeru ne’e daudaun ne’e ba tuir hotu votasaun tanba pasiente COVID-19 iha Vera Crúz laiha,” Orlando da Costa hateten ba Agência Tatoli, iha nia knar fatin, Vera Crúz, Dili, tersa ne’e.
Nia informa, pesoál saúde 38 ne’e ba vota tuir votasaun iha eleisaun prewzidensiál segunda volta sira ida-idak ninia kartaun eleitorál, maibé tanba heta orientasaun servisu hosi mantein nafatin iha sentru izolamentu Vera Cruz entaun nia ba ezerse ninia direitu votu iha sentru votasaun Vera Crúz nian.
“Ha’u hanesan ema Suai-Covalima, komu ema superiór sira orienta katak ha’u labele husik fatin ne’e mamuk, entaun sira haruka ha’u ba vota iha sentru votasaun Vera Crúz, ne’ebé dadaun ne’e ha’u vota ona,” nia dehan.
Jestór Sentru Izolamentu Vera Crúz ne’e hateten, pasiente COVID-19 iha Vera Crúz laiha ona besik fulan ida ka rua ona, ne’ebé daudaun ne’e pesoál saúde sira hodi mantein fali servisu iha Hospitál Nasionál Guido Valadares (HNGV).
“Dadaun ne’e ita-nia funsionáriu hosi HNGV sira mantein hela iha HNGV, enkuantu ita-nia pasiente COVID-19 kuandu iha, sira kualker momentu mai iha izolamentu Vera Crúz. Entaun, daudaun ne’e mantein iha Vera Crúz mak ha’u jestór, asistente no administrasaun, nune’e ba oin ita hein ita-nia supérior sira deside oinsá ita la’o tuir ida-ne’e,” nia hateten.
Maske nune’e, nua’udar sidadaun no eleitór ida, nia iha esperansa katak kandidatu Prezidente Repúblika períodu 2022-2027 ne’ebé povu fó fiar eleitu ba Prezidente Repúblika tenke fóka ba área saúde.
“Hanesan jestór no hanesan ema-ne’ebé servisu iha Governu, ha’u-nia esperansa ba kandidatu Prezidente ne’ebé eleitu ba Prezidente foun hakarak foka liubá área saúde, hanesan fó asisténsia saúde ne’ebé di’akliu, prepara fatin no kondisaun ba ita-nia ema moras ne’ebé mak barak liu, nune’e mós prepara fasilidade ba saúde ne’ebé di’akliu,” nia esplika.
Nia sente kontente tuir eleisaun ne’e, tanba eleisaun segunda volta ne’e ninia situasaun la’o ho dame no ema hotu ba tuir votasaun, katak sidadaun hotu-hotu hakarak tebes iha mudansa hodi fó votu ba Prezidente ne’ebé di’ak.
Entretantu, tuir informasaun ne’ebé Agência Tatoli asesu iha terretu katak, iha sentru Izolamentu Tasi-Tolu, Lahane, inklui mós iha Vera Crúz daudaun ne’e pasiente COVID-19 laiha ona, tanba ne’e pesoál saúde sira livre hodi ezerse sira-nia direitu votu iha eleisaun Prezidensiál volta daruak iha ida-idak ninia moris fatin.
Jornalista : Nelia Fernandes
Editór : Cancio Ximenes
