CNE garante sei verifika buletin votu ho responsabilidade

DILI, 22 abríl 2022 (TATOLI)—Prezidente Komisaun Nasionál Eleisaun (CNE-sigla portugés), José Agostinho da Costa Belo, garante CNE halo verifikasaun ba buletin votu ne’e ho servisu responsabilidade ne’ebé másimu no kualidade.
Notísia Relevante: CNE: apuramentu nasionál sei hahú aban

“Ita fiar metin katak servisu ida-ne’e sei fó sai rezultadu ho responsabilidade no másimu, hatudu duni ita-nia kualidade ba rai no povu ida-ne’e,” Prezidente CNE ne’e hateten ba jornalista sira, iha serimónia abertura apuramentu nasionál ba akta, iha salaun CNE, Dili sesta ne’e.
Verifikasaun ne’e muda uitoan tanba antes ne’e meza lima maibé agora meza muda no la hanesan ho primeira volta nian, nune’e iha oras 72 nia laran bele konklui ho lalais no bele submete ba Tribunál Rekursu hodi halo validasaun.
CNE halo verifikasaun ba bulletin votu nulu sira no hein mós urna hosi diáspora nian no halo apuramentu nasionál bainhira remata, CNE sei fó sai rezultadu provizóriu no fó oportunidade ba interresante sira atu halo rekursu ruma karik iha buat ruma.
Nune’e, ekipa verifikadór sira sei verifika votu nulu, reklamadu inklui bulletin branku sira ne’ebé sei partisipa hosi fiskál sira ne’ebé reprezenta hosi interessante na’in-rua inklui observadór internasionál no nasionál ne’ebé sesta (22/04) ohin, hahú halo apuramentu nasionál ne’ebé hahú iha tuku 08h00 dadeer no sei termina iha tuku 00h00 kalan boot.
Verifikasaun ba bulletin votu iha apuramentu nasionál ne’e, hahú halo avaliasaun hosi munisípiu Aileu, Ainaro no Baucau nian.
Rezultadu apuramentu munisipál hatudu katak Kandidatu prezidente Repúblika ho númeru sorteiu ida (1), José Ramos Horta, hetan votu 397.145 (62.09 %) no kandidatu Prezidente Repúblika ho númeru sorteiu rua (2), Francisco Guterres ‘Lú Olo’, halibur votu 242.440 (37.91 %), hodi termina STAE nia responsabilidade no sei submete ba CNE atu halo apuramentu nasionál.
Totál eleitór iha nivél nasionál no diáspora hamutuk 859,925, no hosi númeru ne’e eleitór ne’ebé partisipa eleisaun 559,814 (65,10%) ne’ebé kompostu hosi mane 289,758 (51,76%) no feto 270,056 (48,24%).
Jornalista : Osória Marques
Editór : Cancio Ximenes

