DILI, 27 abril 2022 (TATOLI)—Sekretária Estadu Komuniaksaun Sosiál (SEKOMS) koopera ho Tékniku Informasaun Komunikasaun (TIC-Sigla Portugés), kuarta ne’e lansa portal (website) “goodnewsontl.gov.tl”.
Sekretáriu Estadu Komunikasaun Sosiál (SEKOMS), Merício Juvinal dos reis ‘Akara’, hateten objetivu ba lansamentu ne’e atu Timor orgullu nafatin ba nia Nasaun, orgullu nafatin ba nia kreatividade no imajen pozitivu sira hodi hatudu ba mundu.
“Ida-ne’e atu ita hahú kombate lia falsu sira liuhosi habelar tan informasaun pozitivu ka good news kona-ba Timor-Leste, nune’e neineik-neineik ema sei la fiar lia falsu sira-ne’e maibé ema fiar ba notísia di’ak. Se lae, ita fiar ho informasaun falsu sira neneik-neneik ita sei lakon ita-nia orgullu ba ita-nia rai rasik,” Merício Juvinal dos reis ‘Akara’ hateten ba jornalista sira, hafoin lansa website “goodnewsontl.gov.tl”, iha resintu Palásiu Governu, Dili.
Alende habelar informasaun, platarforma dijitál ne’e mós ajuda komunikasaun externál internasionál tanba iha portal ne’e ema bele lee no akonpaña notísia di’ak, tanba portál ne’e uza lian haat (4) mak hanesan Tetum, Inglés, Portugués no Maláiu.
Ezemplu, nia dehan, SEKOMS sei husu lisesna ba Agência Tatoli, I.P no Rádiu Timor-Leste, Empreza Públiku (RTTL, E.P) atu kontribui informasaun ka notísia di’ak, entaun to’o ikus objetivu atu promove imajen pozitivu nasaun ba mundu ne’e bele atinje.
Maske nune’e, portal ne’e la’os rekolla informasaun hosi parte Governu nian de’it maibé sei rekolla informasaun hosi individu no instituisaun sira, tanba portál ne’e la’ós ba Governu no SEKOMS de’it maibé portal ne’e ba nasaun nian.
“Ida ne’e ba hotu-hotu, ne’ebé nia halo fotográfia no vídeo di’ak hatama iha ne’e, tanba ne’e nasaun ni’an,” nia dehan.
Prezidente Konsellu Imprensa (CI, sigla portugés), Virgílio da Silva Guterres, apresia ba inisiativa Sekretária Estadu ba Komuniaksaun Sosiál (SEKOMS) ne’ebé mak lansa ona portal “goodnewsontl.gov.tl”.
“Ha’u hanoin inisiativa di’ak. Agora presiza mak atu hatene loloos konseitu kona-ba good news. Hanesan good news ita hakarak informasaun pozitivu de’it ka oinsa, tanba news ne’e kombinasaun buat rua pozitivu no negativu tama hotu iha laran. Maibé, ida-ne’e ita ko’alia kona-ba informasaun sira-ne’ebé pozitivu hodi projeta ita-nia imajen iha li’ur, entaun ida-ne’e buat di’ak. Agora, importante mak kooperasaun ho ministériu sira seluk. Purtantu, la’ós ho mídia officer sira de’it, ha’u hanoin hosi parte komunikasaun hosi Ministériu hotu-hotu, nune’e sira bele kontribui informasaun ne’e kontinua, atu nune’e portál ne’e labele mamuk,” Prezidente CI ne’e hateten.
Portál “goodnewsontl.gov.tl” ne’e dezenvolve ka kria hosi TIC Timor ne’ebé koopera ho SEKOMS no MAPKOMS, ne’ebé atu divulga ka disemina informasaun pozitiva ka notísia di’ak sira kona-ba saida mak akontese iha Timor-Leste, tantu asaun di’ak sira ne’ebé Governu halo ona iha impaktu ba sosiedade, nune’e mós atu promove kreatividade sira-ne’ebé Timor-Leste iha.
“Ida-ne’e atu promove poténsia pozitivu iha setór ekonomia, turistika no setór seluk, atu nune’e nasaun seluk bele hatene kona-ba dezenvolvimentu iha Timor-Leste. Entaun, bainhira kontribui good news ne’e, mídia officer hosi Ministériu ka Instituisaun sira asina akordu ho SEKOMS, atu nune’e bele kontribui good news ba website ne’e,” nia dehan.
Entretantu, partisipante ba atividade ne’e hosi Sekretáriu Estadu Komunikasaun Sosiál (SEKOMS), Merício Juvinal dos reis ‘Akara’, Sekretária Estadu Igualdade no Inkluzaun (SEII), Prezidente Konsellu Imprensa (CI, sigla portugés), Prezidente Ajénsia Notisioza Timor-Leste, TATOLI, I.P no seluk tan.
Jornalista : Nelia Fernandes
Editór : Cancio Ximenes
