DILI, 30 abríl 2022 (TATOLI)—Prezidente Repúblika, Francisco Guterres Lú Olo, sesta (29/04) ne’e, simu karta kredensiál virtualmente hosi embaixadór na’in-lima ba Timor-Leste.
“Embaixadór na’in-lima ne’ebé aprezenta karta kredensiál ba Prezidente Repúblika mak hosi Embaixadór Repúblika India Manoj Kumar Bharti, Embaixadór Santa Sé Arsebispu Wojciech Zaluski, Embaixadora Kanada Nadia Burger, Embaixadora Repúblika Turki Askin Asan no Embaixadór Angola Daniel António Rosa,” refere komunikadu imprensea ne’ebé Agência Tatoli asesu, sábadu ne’e.
Embaixadór na’in-lima naun-rezidente aprezenta sira-nia karta kredensiál virtualmente tanba haree ba kestaun konetividade nu’udar impaktu hosi pandemia COVID-19.
Maske nasaun barak rekupera ona hosi Coron virus, maibé konetividade sei sai kestaun ne’ebé difikulta mobilidade ema-nian hosi nasaun ida ba nasaun seluk.
Embaixadór hosi País lima ne’e barakliu mak hala’o sira-nia reprezentasaun diplomatika de’it, seidauk dezenvolve kooperasaun entre país sira-ne’e.
Tuir planu, Governu Timor-Leste no India sei hametin liután kooperasaun entre país rua maibé tan pandemia COVID-19 seidauk bele konkretiza akordu ne’ebé dezenvolve tiha ona.
Prezidente Repúblika haksolok tebes simu karta kredensiál husi país lima no espera katak ba futuru sei hametin liután relasaun ho Timor-Leste.
Jornalista : Osória Marques
Editór : Cancio Ximenes
