Komandu PNTL Dili preokupa kondisaun edifísiu Eskuadra Cristo-Rei

DILI, 10 maiu 2022 (TATOLI)— Komandante Polísia Nasionál Timor-Leste (PNTL), Munisípiu Dili, Superintedente Xefe Henrique da Costa, preokupa ho kondisaun edifísiu Eskudra Cristo-Rei ne’ebé grave tebes.
“Ita haree direitamente kondisaun edifísiu Eskuadra PNTL Cristo-Rei ne’ebé ho kondisaun grave ka kondisaun ladiak tanba bainhira udan difikulta serbisu membru sira nia. Tanba plafon sira tabele hotu,no tempu udan la seguru atu membru sira atu halo serbisu,” Komandante PNTL Munsípiu Dili ne’e hateten ba jornalista sira hafoin remata enkotru avalisaun Estrutura no membru PNTL iha Eskudra Cristo-Rei iha Becora, tersa ohin.
Superintedente Xefe ne’e, hateten kona-ba kondisaun edifísiu Eskuadra ne’e sei aprezenta ba iha Komandu Jerál PNTL hodi hato’o ba Governu, nune’e bele tau atensaun ba iha kondisaun Eskuadra Cristo-Rei ne’e.
“Kona-ba ida edifísiu Eskuadra Cristo-Rei nian ekipa Ministériu Interiór mai sukat ona rai iha ne’e, agora ita hein bainhira maka atu halo reabilitasaun ba fatin ne’e,” nia afirma
Maske nune’e, Komandu PNTL kontinua enkoraja no dezafia membru sira atu kontinua hatudu serbisu ne’ebé di’ak hodi asegura seguransa iha kapitál Dili.
“Hanesan Komandante, hanesan superior, ita hakarak mai apresia no hatoo mós Komandante Jerál PNTL nia mensajen ne’ebé louva no apresia ba iha esforsu tomak ba iha membru sira ne’ebé maka hatudu ona serbisu di’ak hodi fó susesu ba ita kampaña no eleisaun prezidensiál,” nia kongratula.
Tanba ne’e, nia husu membru sira kontinua hatudu serbisu ho profisionál no dixiplina, loyalidade hodi serbí povu no nasaun.
Jornalista: Natalino Costa
Editór : Florencio Miranda Ximenes

