LEI, NASIONÁL

FONGTIL husu Governu tau antensaun ba joven TL servisu iha ra-li’ur

FONGTIL husu Governu tau antensaun ba joven TL servisu iha ra-li’ur

Diretór Ezekutivu Forum Organizasaun Naun Governamentál Timor-Leste (FONGTIL), Valentim da Costa Pinto. Imajen Tatoli/António Daciparu.

DILI, 14 junu 2022 (TATOLI)—Diretór Ezekutivu Forum Organizasaun Naun Govermentál Timor-Leste (FONGTIL), Valentim da Costa Pinto, preokupa no husu Governu tenke sériu tau atensaun ba ho joven Timor-Leste ne’ebé sai ba servisu iha rai-li’ur, tanba futuru Timor-Leste laiha ona rekursu kualifikadu.

Notísia Relevante: PR Horta: Presiza kria kuadru legál proteje traballadór doméstika iha rai-laran

“Ami preokupa ho ita-nia joven sira ba hotu servisu iha rai-li’ur, tanba ne’e Governu no Estadu tenke seriu haree no atensaun ba ida-ne’e. Tanba, ami haree katak ita-nia joven sira-ne’ebé ba kompete tuir formasaun hodi kompete ba oportunidade servisu, liu-liu ba estranjeiru ne’e tinan 24 mai kraik. Imajina sira hatais uniforma eskola Sekundária ba tuir kompetisaun, ida-ne’e ha’u hanoin presiza sériu no tenke proteje, atu ita-nia joven sira idade eskola tenke hetan atensaun atu eskola. Bainhira sira ramata ona estudu iha Ensinu Supérior ne’e, prontu sira bele kompete ba kampu servisu,” Valentim da Costa Pinto, hateten ba jornalista sira, iha ámbitu semináriu kona-ba komemorasaun loron mundiál Traballadór Doméstika, ho tema “Valóriza no fó protesaun legál ba traballadór doméstika iha Timor-Leste” ne’ebé realiza iha Salaun Lúz Clárita, Díli, tersa ne’e.

Joven sira-ne’ebé idade sei eskola ne’e Estadu tenke haree, tanba tauk iha tinan 20 mai nasaun Timor-Leste laiha ona rekursu ne’ebé kualifikadu, tanba ema hotu kompete ba servisu iha rai-li’ur. Ida-ne’e labele akontese tanba tanba joven sai hanesan esperansa ba kontinuasaun Estadu no Nasaun ida-ne’e, nune’e Governu no Estadu tenke tau atensaun ba asuntu ne’e. 

Nia husu atu Governu servisu hamutuk ho setór privadu sira iha Timor-Leste atu kria kampu servisu, nune’e joven sira labele sai hotu ba rai-li’ur hodi buka servisu.

“Tanba, ita lakohi ita-nia rai joven produtivu sai hotu ba rai-li’ur. Bainhira ita presiza buat ruma iha ne’e, ema seluk mak sei mai servisu tanba ita-nia joven sira ba hotu rai-li’ur. Ida-ne’e, ha’u hanoin sériu Estadu tenke tau matan lalais no ami kontinua husu atu asuntu ne’e tenke hetan atensaun lalais, atu evita ita-nia joven sira labele sai hotu ba li’ur,” nia dehan.

Tuir nia, ida ne’e prejutika tebes ba iha Timor-Leste tanba idade joven sira loloos ba eskola hodi aumenta koñesimentu liuhosi siénsia oioin maibé hot-hotu ba ona servisu.

“Ha’u la fiar katak sira hetan ona osan, sira sei bele mai servisu fali. Tanba, bainhira sira hetan servisu ona, iha nesesidade barak ne’ebé sira atende. Iha tinan 20 no 30 mai, ita sei iha problema kona-ba rekursu humanu ne’ebé kualifikadu,” nia dehan.

Jornalista : Nelia Fernandes

Editór      : Cancio Ximenes

iklan
iklan

Leave a Reply

iklan
error: Content is protected !!