iklan

BOBONARO, MUNISÍPIU, SAÚDE

Xefe suku Gildapíl husu MS harii postu saúde iha aldeia Atus

Xefe suku Gildapíl husu MS harii postu saúde iha aldeia Atus

Xefe suku Gildapil,postu administrativu Lolotoe,munisipiu Bobonaro,Emiliano Noronha.Imajen Tatoli/Sergio da Cruz

BOBONARO, 02 jullu 2022 (TATOLI)— Xefe Suku Gildapíl, postu administrativu Loloto’e, munisípiu Bobonaro, Emíliano Noronha, husu ba Ministeriu Saúde (MS) atu harii postu saúde ida iha aldeia atus, hosi fasilita komunidade sira hetan tratamentu saúde.

“Ha’u husu ba Ministra Saúde atu konstrui postu saúde iha aldeia Atus tanba durante ne’e komunidade sira atu asesu ba fasilidade saúde tenke la’o ain hosi suku ne’e ba fali Loloto’e Villa no postu saúde iha suku Saburai,postu administrativu Maliana ho distánsia kilometru 30-resin,”  Xefe Suku ne’e, hateten liuhosi diálogu komunitáriu ho membru Governu sira iha sede suku Lontas, sesta ne’e.

Notisia Relevante:2019 too 2022, MS konstrui fasilidade saúde 639 iha territóriu nasionál

Maski, nia dehan hato’o ona proposta ba autoridade munisípiu Bobonaro liuhosi Programa Dezemvolvimentu Integradu Munisipál (PDIM) atu tau iha planu prioridade tinan 2023, maibé to’o agora seidauk iha resposta.

“Ami nia komunidade hasoru difikuldade tebes bainhira moras todan liuliu inan isin rua sira tanba problema kondisaun estrada la di’ak iha tempu udan bele fó impkatu ba sira bainhira halo viajen bá halo tratamentu iha fasilidade,” nia afirma.

Komunidade iha aldeia Atus hamutuk 714, kompostu hosi Feto 362 no Mane 352, ho totál uma-kain 153,  ne’ebé jeografikamente lokaliza iha área remota besik kedas fronteira terrestre entre Timor-Leste ho Atambua Kabupaten Belu, Provinsia Nusa Tengara Timur (NTT)-Repúblika Indonezía.

Ministra Saude,Odete Maria Freitas Belo. Imajen Tatoli/Sergio da Cruz

Hatan ba kestaun ne’e, Ministra Saúde, hataten daUdaun Postu saúde iha territóriu laran tomak 300-resin, no hahú planu atu konstrui tan 125.

“Fasilidade saúde ne’e só bele harii deit iha suku,maibe sei la taka dalan mós ba aldeia sira ne’ebé iha liu área izoladu ne’ebé difisíl tebes asuse ba postu saúde,” Minsitra Saúde ne’e hateten.

Tuir kritériu atu konstrui postu saúde mak abitante iha aldeia ne’e minimu 500 ba leten no bainhira harii duni fasilidade saúde ne’e ho espasu ne’ebé kiik liu kompara ho postu saúde iha suku sira.

“Diretór Servisu Saúde Munisípiu no Ministériu Saúde sei halo levantamentu ruma sai mak bele konstrui fasilidade saúde iha aldeia Atus,” Governante ne’e kompromete.

Governante hatutan bainhira governu establese postu saúde ne’e, lideransa komunitaria mós presiza identifika Enfermeira no Médiku mai hosi suku ne’e rasik, atubele fó atendimentu saúde ba komunidade sira.

Notisia Relevante :MS apela ba kargu xefia uza fasilidade saúde ho kuidadu

Jornalista: Sérgio da Cruz

Editór       : Florencio Miranda Ximens

iklan
iklan

Leave a Reply

iklan
error: Content is protected !!