DILI, 08 jullu 2022 (TATOLI)—Diretór Servisu Munisipál Jestaun Merkadu no Turizmu, Arthur Henriques, informa nia parte sei koordena ho Ministériu Turizmu Komérsiu no Indústria (MTCI) hodi hadi’a fatin turístiku Cristo Rei hanesan uma iha tasi-ibun ne’ebé aat ba daudaun ne’e.
Notísia Relevante: Atensaun! Estudante soe lixu arbiru, Governu la tau matan ba jardin
“Kona-ba fatin turístiku ne’ebé aat iha área Cristo Rei, munisípiu Dili sei hala’o koordenasaun ho Ministériu Turizmu Komérsiu no Indústria atu bele normaliza. Tanba, uma oan sira iha ne’ebá balun agora daudaun monu ona, ne’ebé presiza fó atensaun,” Arthur Henriques hateten ba Ajénsia Tatoli iha nia knar fatin, Dili, sesta ne’e.
Daudaun ne’e, Servisu Munisipál Jestaun Merkadu no Turizmu identifika ona fatin turístiku iha área Cristo Rei, maibé tenke koordena ho Ministériu Turizmu Komérsiu no Indústria (MTCI) atu haree asuntu ne’e.
“Iha ne’ebá, ami identifika ona fatin turístiku lima mak daudaun ne’e aat entaun ami sei koordena ho Ministériu kompetente, tanba uluk sira mak kontrola kona-ba área turistika nian,” nia dehan.
Maske nune’e, nia fo razaun, fatin turístiku ka uma oan iha área Cristo Rei aat ka monu tanba motivu hosi tasi-been.
“Uma oan iha área Cristo Rei monu ne’e motivu hosi tasi-been. Uma ne’e mós kle’ur ona ne’ebé tasi been kuandu mai kee rai-henek ne’e, hosi ne’e nia mesak monu. Tanba ne’e, MTCI tenke haree asuntu ne’e,” nia hateten.
Entretantu, tuir observasaun jornalista Agência Tatoli iha terrenu nota katak fatin turístiku ka uma oan iha área Cristo Rei daudaun ne’e balun kondisaun aat, hanesan balun komesa monu no balun mós nia kakuluk naksobu ba daudaun ona.
Jornalista : Nelia Fernandes
Editór : Cancio Ximenes
