Progresu-dezenvolvimentu Timor-Leste hahú hosi funsionáriu públiku ne’ebé joven liu

DILI, 15 jullu 2022 (TATOLI)—Ministru Administrasaun Estatál (MAE), Miguel Pereira de Carvalho, hateten progressu no dezenvolvimentu Timor-Leste nian hahú hosi funsionáriu ne’ebé joven liu.
Notísia Relevante: Komisaun Organizadora hahú halo preparasaun ba loron funsaun públika
“Progresu no dezenvolvimentu Timor-Leste nian, hahú hosi funsionáriu públiku ne’ebé joven liu, ne’ebé mak foin hahú servisu no sira-ne’ebé hala’o funsaun iha baze to’o sira-ne’ebé avansadu ona no xefe sira,” Governante ne’e hateten liuhosi diskursu iha ámbitu selebrasaun loron funsaun públika ba daualuk iha Ministériu Finansa, Dili, sesta ne’e.
Iha área no funsaun hotu-hotu, sai fundamentál mak kompeténsia, prontidaun, efikásia hanesan servidór Estadu nian, hahú hosi traballadór iha água no saneamentu to’o médiku, profesór, auxiliár, asaun médika no funsaun sira seluk, buat hirak ne’e hotu esensiál no bele kontribui ba konstrusaun Estadu ba país ida ho progresu no bein-estar.
Tanba ne’e, parte importante ida hosi administrasaun públika mak integra servisu delegadu oioin iha autoridade no Administrasaun Munisipál sira, no servisu hosi funsionáriu públiku hirak ne’e fundamentál ba hadi’a prestasaun servisu Estadu nian.
Biban ne’e, komisaun organizadora mós entrega premiu ba manan-na’in ba jogu ho madalidade haat (4) hanesan voley ball ba feto ho mane, basket ball feto ho mane, futeból salaun feto ho mane no dada tali feto ho mane.
Hosi modalidade haat ne’e MAE mak foti taxa rotativa ba tinan ne’e, tanba ne’e MAE hetan primeiru lugar ba modalidade voley ball, footsal ball no dada tali nian.
MAPKOMS kontente sai KO ba aniversáriu funsaun públika 2023
Entretantu, Diretór Jerál Ministériu Asuntu Parlamentar Komunikasuan Sosiál (MAPKOMS), Ponciano da Cruz Leite, kontente tanba MAPKOMS sai uma-na’in ba komemorasaun aniversáriu loron nasionál funsaun públika ba dala-IX iha 2023.
“Ksolok ida mai ami hetan fiar atu sai komisaun organizadora ba loron nasionál funsaun públika ba dala-IX maibé ksolok ne’e sei lori todan,” Ponciano hateten ba jornalista sira, hafoin dada rifa entre liña ministeriál sira, iha MF, Dili, ohin.
Diretór ne’e hatutan bainhira hakmaan todan ne’e mak presiza servisu hamutuk hodi hala’o loron nasionál importante ne’e.
“Ha’u pesoál ba ida-ne’e ba dala rua tanba dahuluk iha Palásiu Prezidensiál no agora iha ne’e, entaun ami sei halo esforsu atu komemorasaun roon funsaun públika dala-IX ida-ne’e di’ak no posivelmente partisipante ativa hosi liña ministeriál ho órgaun para servisu di’ak liután bainhira konvida,” nia dehan.
Jornalista : Osória Marques
Editór : Cancio Ximenes

