Trimestre daruak: MAKLN ezekuta OJE 2022 atinje millaun $48

DILI, 26 jullu 2022 (TATOLI)—Diretora Nasionál Administrasaun Finansa (DNAF), Rosa da Costa Gomes, relata Orsamentu Jerál Estadu (OJE) 2022 iha trimestre daruak nian ne’e, MAKLN ezekuta ona 47% ho ekivalente ho osan millaun $48.
Notísia Relevante: MAKLN ezekuta OJE 2022 atinje 24% iha trimestre dahuluk
“Iha trimestre daruak ne’e, MAKLN ezekuta ona 47% ho ekivalénsia osan hamutuk $47,914,311,43 hosi orsamentu aprovasaun $102,184,114. Entaun, osan ne’ebé mak sei hela hamutuk $54,242,802,57,” Rosa da Costa Gomes relata ba Agência TATOLI, liuhosi WhatsApp, tersa ne’e.
Hosi osan millaun $48 ne’e, nia dehan, ezekuta ba kategória no vensimentu $343,218,85 hosi orsamentu aprovadu $731,126,00 no hela hamutuk $386,907,15; bens no servisu hamutuk $1,252,758,73 hosi orsamentu aprovadu $3,580,128,00 no hela 2,327,369,27; kapitál menor seidauk ezekuta maibé ho nia osan aprovadu $103,200.
Kapitál dezenvolvimentu ezekuta ona osan $545,561,54 hosi osan aprovadu $4,910,000 no osan ne’ebé sei hela hamutuk $4,364,438,46; no kategória transferénsia públika ezekuta ona osan $45,799,772,31 hosi osan aprovadu $92,859,660,00 no osan hela $47,059,887,69.
Atividade no programa sira-ne’ebé mak MAKLN halo iha trimestre daruak nian mak kontinua halo verifikasaun ba dokumentu benefisáriu nian hosi munisípiu 12 inklui RAEOA no mós kona- ba verifikasaun dadus veteranu rejistadu 2009.
Jornalista : Osória Marques
Editór : Cancio Ximenes

