Operadór atividade agríkola munisípiu rua asesu ona voucher kombustível
DILI, 01 agostu 2022 (TATOLI)—Operadór atividade agríkola no peska hosi munisípiu rua asesu ona voucher kombustível faze dahuluk ne’ebé Governu lansa iha loron 11 jullu 2022.
“Kona-ba subsídiu ba Ministériu Agrikultura no Peska (MAP), lista parte agríkola ne’ebé foin lalais tama hosi munisípiu hitu hamutuk 971, maibé hosi númeru ne’e foin munisípiu rua mak hetan hanesan Lautém no Baucau ho totál benefisiáriu 174,” Xefe Departamentu Mekanizasaun Produsaun Alimentár no Jestaun Poskolleta iha MAP, Suzana Constâncio Vilanova, hateten ba Agência Tatoli, iha ninia knaar fatin MAP, Comoro, segunda ne’e.
Notísia relevante: Governu lansa subsídiu voucher ba transporte públiku no operadór agríkola-peska
Munisípiu lima ne’ebé seidauk simu voucher mak hamesan Ainaro ho benefisiáriu 116, Covalima 408, Manufahi 113, Liquiçá 25, no Bobonaro 135.
“Munisípiu lima seidauk simu voucher tanba kompañia fornesidór sira iha munisípiu lakohi fornese ho razaun ita-nia operasionál ba sentru halo distribuisaun ne’e kiik, entaun ema lakohi halo distribuisaun to’o sentru sira,” nia akresenta.
Ba kestaun, daudaun parte MAP buka hela solusaun nune’e hirak ne’ebé seidauk hetan bele tama hotu ba faze daruak no datoluk nian.
“Ita tenke rezolve uluk ho kompañia kombustível sira nune’e kompañia ne’ebé distribui ne’e to’o ba sentru no suku sira,” nia tenik.
Enkuantu, ba munisípiu sira seluk hanesan Viqueque, Aileu, Manatuto, Rejiaun Administrativa Espesiál Oé-cusse Ambeno (RAEOA) no seluk tan sira seidauk asesu hotu ba voucher tanba ekipa téknika sei rekolla dadus iha terrenu no seidauk konklui.
Jornalista : Arminda Fonseca
Editora : Julia Chatarina
