Konstrusaun kampu futeból Lecidere atinje ona 90%

DILI, 03 agastu 2022 (TATOLI)—Konstrusaun kampu futeból iha Lecidere ne’ebé kompañia Chan-Hai Cina konstrui daudaun ne’e atinje ona 90% no sei finaliza iha fulan-agostu ne’e
“Konstrusaun ne’e ramata iha fulan-agustu no sei entrega ba Governu Timor-Leste liuhusi Sekretáriu Estadu Juventude Desportu (SEJD). Agora hein de’it mak monta lampu esponza iha kampu laran,” Supervizór, Agustino da Silva Freitas, hateten ba Agência Tatoli iha nia kna’ar fatin Lecidere, kuarta ne’e.
Konstrusaun ne’e hela 10% mak monta esponza, tau lampu no tau rede, posibilidade sei entrega kampu ne’e ba SEJD iha loron 30 agustu tinan-ne’e, tanba tuir kontratu ne’ebé kompañia Chan-Hai iha konstrusaun ne’e ramata iha loron 75 nia-laran.
“Konstrusaun ne’e ami hahú iha fulan-abríl tinan ne’e. Tuir kontratu loron 75 nia-laran tenke ramata halo konstrusaun. Maibé materiál ba konstrusaun ne’e mai tarde entaun konstrusaun ne’e sei ramata no entrega hikas ba Governu depois ramata fulan-agostu,” nia dehan.
Konstrusaun ba kampu futebíl Leidere ne’e konstrui hosi traballadór timoroan hamutuk na’in-30 to’o kampu ne’e ramata, tanba kampu ne’e ho medida naruk mak metru 90 no luan metru 42.
Osan ne’ebé mak aloka ba konstrusaun kampu futeból iha Lecidere ne’e ho montante rihun $3 resin.
Jornalista : Osória Marques
Editór : Cancio Ximenes

