EDUKASAUN, HEADLINE

PM espera programa foun edukasaun kontribui ba esforsu profesór no alunu

PM espera programa foun edukasaun kontribui ba esforsu profesór no alunu

Estudante sira aprezenta matéria prátika iha ámbitu lansamentu programa ‘eskola ba uma’ iha eskola EBC 30 agostu, Comoro, kinta (04/8). Imajen Tatoli/António Daciparu

DILI, 05 agostu 2022 (TATOLI)—Primeiru-Ministru (PM), Taur Matan Ruak, akompaña hosi Ministru Edukasaun Juventude no Desportu (MEJD), Armindo Maia, lansa programa edukasaun hitu, kinta ne’e.

Programa hitu ne’e mak hanesan eskola iha uma, bolsa estudu ba estudante sira, koneksaun internet ba eskola, distribuisaun livru apoiu aprendizajen, distribuisaun kaderneta, estudu viabilidade no distribuisaun kadeira no meza.

“Inisiativa tenke mai hosi Governu atubele kompromete ho posibilidade hodi hadi’a nasaun ne’e. Ha’u hein katak ho programa sira ne’ebé lansa sei kontribui ba na’i profesór no alunu sira-nia esforsu hodi ajuda ita-nia oan sira atu konkista sira-nia espasu iha tempu oin mai,” PM hateten durante serimónia lansamentu programa hitu edukasaun ne’ebé realiza iha Eskola Ensinu Báziku Sentrál (EBC, sigla portugés) 30 agostu, Comoro.

Notísia relevante: MEJD rejista labarik 80 preparadu partisipa programa eskola iha uma

Primeiru-Ministru, Taur Matan Ruak. Imajen Tatoli/António Daciparu

Xefe Governu konsidera, serimónia lansamentu ne’e nu’udar testemuña vontade Governu no autoridade sira hodi kria kondisaun di’ak ba jerasaun foun sira, ho hanoin ida katak ema mak sai sentru ba dezenvolvimentu.

“Espetativa moris ema-nia iha nasaun ne’e kada tinan sempre aumenta hela de’it, signifika Governu tenke halo esforsu hodi kria kondisaun atu sidadaun sira bele hetan saúde di’ak no moris naruk. Tenke kombate moras a’at sira, buka enkoraja inan sira atu kuidadu ninia oan sira hahú hosi nia kanotak to’o moris mai hodi ba eskola, tenke tau-matan ba edukasaun atu domina koñesimentu siénsia no teknolojia hodi hadi’a padraun moris jerasaun foun sira.

Xefe Ezekutivu dehan, Governu iha responsabilidade atu kria kondisaun hotu hodi kontribui ba prosesu aprendizajen alunu sira.

“Nune’e profesór sira bele iha responsabilidade boot atu tau-matan ba imi, hanorin didi’ak imi, inspira imi, jere eskola didi’ak hodi kria ambiente di’ak ba imi atu bele aprende,” nia akresenta.

Aleinde ne’e, PM Taur husu ba inan-aman sira atu iha mós responsabilidade ba oan sira hodi haruka ba eskola no kontrola-oan sira bainhira fila ona hosi eskola.

“Karik iha matéria ruma maka profesór fó, inan-aman sira tenke tuur hamutuk ho oan sira hodi rezolve, buka enkoraja sira mai eskola. Ida-ne’e nu’udar esforsu hosi ema hotu liuhosi kontribuisaun de’it,  maibé atu determina futuru loloos maka estudante sira. Imi mak sei determina imi-nia destinu no imi mak sei determina imi-nia futuru. Imi-nia futuru sei la fó hosi bandeja, maibé imi maka konkista rasik,” nia fó hanoin.

PM mós tau esperansa ba jerasaun foun sira iha tinan 40 oin mai sei transforma Timor sai di’ak liután fali tempu jerasaun antigu sira, maski atu to’o iha ne’ebá hotu-hotu tenke luta maka’as. Tanba tempu no futuru agora ne’e iha jerasaun foun nian kaba’as, tanba ne’e kada jerasaun tenke iha responsabilidade hodi fó kontribuisaun tuir kbiit ne’ebé iha.

Ministru Edukasaun Juventude no Desportu, Armindo Maia, akompaña hosi Vise-Ministru Finansa, António Freitas, simbólikamente entrega meza no kadeira ba profesór no estudante iha ámbitu lansamentu eskola ba uma, iha Eskola EBC 30 agostu, Comoro, kinta (04/8). Imajen Tatoli/António Daciparu

Iha biban hanesan, Ministru Edukasaun Juventude no Desportu, Armindo Maia, hateten MEJD hala’o nia kna’ar tomak hodi responde ba dezafiu no nesesidade, ne’ebé setór edukasaun enfrenta, liuhosi vizaun no misaun VIII Governu katak ema mak sai sentru ba dezenvolvimentu iha tinan 2022 maka dudu Parlamentu Nasionál aprova Orsamentu Retifikativu ne’ebé mak konsege kobre ona programa lubuk ida.

“Programa VIII Governu konstitusionál ne’e hanesan kompromisu hodi reforsa programa edukasaun no formasaun ne’ebé mak tutela hosi MEJD, programa eskola ba uma ne’ebé mak sei inisia ho modalidade ensinu família no servisu ensinu biblioteka movel. Programa ida-ne’e hahú pilotu iha munisípiu Dili no mai ho hanoin atu manorin sira sei vizita uma kain hodi halibur labarik sira ne’ebé iha komunidade, atu nune’e bele aprende letra, númeru, lee no hakerek,” governante ne’e relata.

Programa seluk ba formasaun profesór sei koloka estudante nu’udar sentru ba aprendizajen no sei konsentra ba formasaun profesór iha nível eskolár sira iha ensinu báziku to’o ensinu sekundáriu. Tanba ne’e, MEJD sei hahú halo estudu viabilidade ba programa ne’ebé hetan ona aprovasaun hosi Lei Grande Opsaun no Planu.

“Progresu iha mundu ohin loron kontinua la’o no teknolojia sai nu’udar ezijénsia ida iha vida sosiedade moderna ohin loron nian, VIII Governu konsidera katak fornesimentu internet ba eskola importante tebes hodi fasilita estudante no Profesór sira atu nune’e haforsa sira-nia ensinu apreendizajen,” nia akresenta.

Programa hirak ne’e MEJD kobre husi Orsamentu Jerál Estadu (OJE) 2022 inklui mós halo distribuisaun kadeira no meza hamutuk 20.000 ba eskola sira hosi ensinu pre-eskolár to’o ensinu sekundária jerál.

Jornalista   : Tomé Amado

Editora        : Julia Chatarina

iklan
iklan

Leave a Reply

iklan
error: Content is protected !!